Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Urimi i myftiut të Shkodrës, Imam Ndriçim Sulejmani

me rastin e hyrjes së hënës së re të muajit Ramazan 1428-2007

Të dashur besimtarë muslimanë,

Të nderuar qytetarë të qarkut Shkodër,

   Edhe pak orë na ndajnë nga shfaqja e begatë e hënës së re të muajit të madhnueshëm të Ramazanit, stinës së mëshirës, faljes dhe begative hyjnore, me të cilat All-llahu Fuqiplotë shpërblen robët e Tij, njerëzit që besojnë në Njësinë e Tij dhe mëshirën e pakufishme me të cilën i begaton çdo ditë.

   Edhe pak orë na ndajnë nga afrimi i teravisë së parë, namazit të dashurisë dhe lidhjes së ngushtë me besimin dhe përkushtimin ndaj All-llahut, Krijuesit të paqes dhe Mbrojtësit të robëve të Tij që ndërtojnë paqen dhe urat e komunikimit ndërnjerëzor me paqe.

   Edhe pak orë na ndajnë nga afrimi i kohës së syfyrit të parë, në të cilin muslimanët zgjohen për t’u mbledhur në sofrat e begatisë dhe bereqetit, për të dalë më pas nga shtëpitë e tyre drejt xhamive në përgjigje të thirrjes së ezanit të parë të ditës së parë të agjërimit.

   Edhe pak orë na ndajnë nga momenti kulminant i afrimit të iftarit, ku muslimanët me zemra të ngrohura besimtare dhe me duart e drejtuara nga lartësitë e bardha, në kërkim të mëshirës, faljes, rizkut dhe mirëqenies, gëzohen me sihariqin e pranimit të agjërimit të tyre për hatrin dhe pëlqimin e All-llahut Mëshirëbërës.

Motra dhe vëllezër muslimanë,

   Me rastin e hyrjes së hënës së re të këtij muaji të dëshmuar për begati dhe mirësi, ju dëshiroj nga zemra mbarësi dhe përkushtim në marrëdhënie me flladet e mëshirës, faljes dhe fitimit të pëlqimit të All-llahut, gjatë 30 ditëve të këtij muaji të begatë.

   Ramazani është muaji i Kuranit, Fjalës së pandryshuar të All-llahut Mëshirues, mundësia më e madhe për të forcuar lidhjet me Librin e fesë tonë, prandaj le të përkushtohemi me sa të kemi mundësi në leximin, kuptimin dhe veprimin e mësimeve të tij, që udhëzojnë drejt më të mirës, drejtësisë, humanizmit, bamirësisë etj.

   Ramazani është muaji i faljes së gabimeve të tjetrit, mos ngurroni të falni e të pranoni faljen e tjetrit!

   Ramazani është muaji i solidarizimit me vuajtjen dhe varfërinë e tjetrit, mos ngurroni të zbusni sadopak vuajtjet dhe varfërinë e tjetrit!

   Ramazani është muaji i lartësimit të fjalës së All-llahut, mos ngurroni të dëshmoni Islamin tuaj kudo që të jeni, në shtëpi, në shoqëri, në çdo mjedis, në mënyrë që drita e muslimanit të ndriçojë sa më shumë shoqërinë tonë!

   Selamet, begatitë, mbarësia dhe pëlqimi i All-llahut qofshin me ju në ditët e këtij muaji dhe ato që pasojnë!

   Me gëzime dhe sihariqe Ramazanin!

Imam Ndriçim Sulejmani

myfti i qarkut Shkodër