{"id":16440,"date":"2025-01-22T20:28:28","date_gmt":"2025-01-22T20:28:28","guid":{"rendered":"https:\/\/myftinia-shkoder.org\/?p=16440"},"modified":"2025-01-22T20:43:27","modified_gmt":"2025-01-22T20:43:27","slug":"radio-fatih-ne-mal-te-zi-bashkebisedim-me-myftiun-e-shkodres","status":"publish","type":"post","link":"https:\/\/myftinia-shkoder.org\/?p=16440","title":{"rendered":"Radio “Fatih” n\u00eb Mal t\u00eb Zi, bashk\u00ebbisedim me Myftiun e Shkodr\u00ebs"},"content":{"rendered":"

Radio “Fatih” n\u00eb Mal t\u00eb Zi, bashk\u00ebbisedim me Myftiun e Shkodr\u00ebs <\/strong><\/p>\n

Paraditen e s\u00eb m\u00ebrkur\u00ebs, m\u00eb 22 janar 2025, Myftiu i Shkodr\u00ebs priti n\u00eb zyr\u00ebn e tij p\u00ebrgjegj\u00ebsin e Radio “Fatih” n\u00eb Podgoric\u00eb t\u00eb Malit t\u00eb Zi, Enis ef. Hoxha. Shkak i k\u00ebsaj vizite ishte d\u00ebshira e shfaqur nga Radio “Fatih” p\u00ebr t\u00eb zhvilluar nj\u00eb bashk\u00ebbisedim me Myftiun e Shkodr\u00ebs, Imam Muhamed B. Sytari me rastin e muajit t\u00eb madh\u00ebruesh\u00ebm t\u00eb Ramazanit.<\/p>\n

N\u00eb p\u00ebrgjigje t\u00eb pyetjeve t\u00eb z. Hoxha, Myftiu Sytari vuri theksin te r\u00ebnd\u00ebsia e madhe q\u00eb muaji i madh\u00ebruesh\u00ebm i Ramazanit, t\u00eb cilin e krahasoi me stin\u00ebn e pranver\u00ebs, q\u00eb t\u00eb gjith\u00eb e presim me padurim; stin\u00eb n\u00eb t\u00eb cil\u00ebn rip\u00ebrt\u00ebrihet jeta, gjall\u00ebrohet natyra dhe t\u00eb gjith\u00eb g\u00ebzohemi me mir\u00ebsit\u00eb dhe flladet bekuese t\u00eb saj.<\/p>\n

Myftiu tha se, muaji i madh\u00ebruesh\u00ebm i Ramazanit \u00ebsht\u00eb mund\u00ebsia m\u00eb e mir\u00eb q\u00eb besimtar\u00ebt t\u00eb rigjejn\u00eb ekuilibrat e vetvetes dhe t\u00eb p\u00ebrsosin marr\u00ebdh\u00ebnien e tyre me Zotin e gjith\u00ebsis\u00eb duke u kujdesur p\u00ebr p\u00ebrsosm\u00ebrin\u00eb e namazit, e agj\u00ebrimit, leximit t\u00eb Kur\u2019anit, sadakas\u00eb dhe veprave t\u00eb mira pa p\u00ebrjashtim.<\/p>\n

Myftiu Sytari vuri theksin gjithashtu te domosdoshm\u00ebria e ruajtjes s\u00eb ekuilibrave t\u00eb muslimanit me Kur\u2019anin Fam\u00eblart\u00eb, si libri i vet\u00ebm, garancia e t\u00eb cilit nuk ka afat skadence. Ai tha se, Zoti i gjith\u00ebsis\u00eb e ka garantuar k\u00ebt\u00eb lib\u00ebr deri n\u00eb dit\u00ebn e fundit, q\u00eb do t\u00eb thot\u00eb se njer\u00ebzimi e ka p\u00ebrher\u00eb nj\u00eb zgjidhje dhe nj\u00eb alternativ\u00eb t\u00eb sh\u00ebndosh\u00eb p\u00ebr t\u00eb korrigjuar veten dhe p\u00ebr t\u00eb gjetur sh\u00ebrim p\u00ebr l\u00ebngatat dhe s\u00ebmundjet e ndryshme me t\u00eb cilat p\u00ebrballet n\u00eb jet\u00ebn e tij. Ai tha se, njeriu i sot\u00ebm m\u00eb shum\u00eb se kurr\u00eb ka nevoj\u00eb t\u00eb kthehet nga Kur\u2019ani dhe t\u00eb marr\u00eb drit\u00ebn e udh\u00ebzimit t\u00eb Zotit t\u00eb gjith\u00ebsis\u00eb n\u00ebp\u00ebrmjet sureve dhe ajeteve t\u00eb shumta t\u00eb tij.<\/p>\n

Myftiu i Shkodr\u00ebs b\u00ebri nj\u00eb krahasim, ku tha se, vitin e kaluar d\u00ebgjuam p\u00ebr djegien e Kur\u2019anit n\u00eb nj\u00eb prej vendeve t\u00eb qytet\u00ebruara t\u00eb Evrop\u00ebs. Ai tha se, muslimani q\u00eb e lexon Kur\u2019anin sot, por nuk i n\u00ebnshtrohet porosive dhe urdh\u00ebresave hyjnore dhe q\u00eb thyen urdh\u00ebresat e Zotit, q\u00eb neglizhon porosit\u00eb e Tij, q\u00eb nuk merr n\u00eb konsiderat\u00eb fjal\u00ebn e Zotit dhe vepron t\u00eb kund\u00ebrt\u00ebn e saj, n\u00eb fakt po b\u00ebn nj\u00eb veprim m\u00eb t\u00eb r\u00ebnd\u00eb se sa djegien fizike t\u00eb librit t\u00eb Zotit.<\/p>\n

Myftiu i Shkodr\u00ebs uroi t\u00eb gjith\u00eb besimtar\u00ebt musliman\u00eb n\u00eb Mal t\u00eb Zi, n\u00eb Ballkan dhe n\u00eb mbar\u00eb bot\u00ebn p\u00ebr nj\u00eb Ramazan t\u00eb mbar\u00eb dhe t\u00eb mbushur me bekime dhe mir\u00ebsi.<\/p>\n