{"id":19357,"date":"2025-10-10T19:48:59","date_gmt":"2025-10-10T19:48:59","guid":{"rendered":"https:\/\/myftinia-shkoder.org\/?p=19357"},"modified":"2025-10-10T19:48:59","modified_gmt":"2025-10-10T19:48:59","slug":"myftiu-i-shkodres-cdo-projekt-mbi-prone-te-grabitur-ka-mallkimet-e-zotit","status":"publish","type":"post","link":"https:\/\/myftinia-shkoder.org\/?p=19357","title":{"rendered":"Myftiu i Shkodr\u00ebs: \u201c\u00c7do projekt mbi pron\u00eb t\u00eb grabitur ka mallkimet e Zotit!\u201d"},"content":{"rendered":"

Myftiu i Shkodr\u00ebs: \u201c\u00c7do projekt mbi pron\u00eb t\u00eb grabitur ka mallkimet e Zotit!\u201d<\/strong><\/p>\n

N\u00eb ligj\u00ebrat\u00ebn e dit\u00ebs s\u00eb xhuma, m\u00eb 10 tetor 2025, q\u00eb Imam Muhamed B. Sytari, mbajti n\u00eb xhamin\u00eb e Parruc\u00ebs, n\u00eb vazhd\u00ebn e komentimit t\u00eb ajetit 21 t\u00eb sures ‘Er-Rum’, u ndal p\u00ebrs\u00ebri te fesadi i madh, q\u00eb ka mbuluar vendin ton\u00eb n\u00eb raport me grabitjen pron\u00ebs s\u00eb tjetrit, ve\u00e7an\u00ebrisht pron\u00ebs vak\u00ebf t\u00eb musliman\u00ebve.<\/p>\n

Myftiu Sytari, nd\u00ebr t\u00eb tjera tha: \u201cGjat\u00eb jav\u00ebve t\u00eb kaluara kemi ndjekur me shqet\u00ebsim situat\u00ebn q\u00eb \u00ebsht\u00eb kthyer tashm\u00eb n\u00eb nj\u00eb praktik\u00eb t\u00eb p\u00ebrs\u00ebritur nd\u00ebr vite n\u00eb vendin ton\u00eb: shkeljen e t\u00eb drejtave t\u00eb komuniteteve fetare \u2014 n\u00eb rastin ton\u00eb, t\u00eb komunitetit ton\u00eb \u2014 lidhur me \u00e7\u00ebshtjen e pronave.<\/p>\n

Kur nj\u00eb komunitet p\u00ebrballet me nj\u00eb fushat\u00eb sistematike, kjo do t\u00eb thot\u00eb se ai po lufton me nj\u00eb s\u00ebmundje t\u00eb thell\u00eb, nj\u00eb s\u00ebmundje q\u00eb ende nuk \u00ebsht\u00eb sh\u00ebruar, e ndoshta \u00ebsht\u00eb b\u00ebr\u00eb e pash\u00ebrueshme. Si pasoj\u00eb, ne po shohim p\u00ebrhapjen e gangren\u00ebs s\u00eb k\u00ebtij fenomeni n\u00eb shoq\u00ebrin\u00eb shqiptare: p\u00ebrhapjen e zullumit, nxitjen e urrejtjes, p\u00ebrhapjen e t\u00eb keqes dhe pranimin e masave ekstreme si t\u00eb drejta..!?<\/p>\n

Dhe ju e dini mir\u00eb, se ne gjithmon\u00eb nxisim q\u00eb njeriu i mir\u00eb dhe besimtari i devotsh\u00ebm t\u00eb mos dor\u00ebzohet kurr\u00eb p\u00ebrball\u00eb stuhive t\u00eb mohimit dhe shejtanit t\u00eb mallkuar.<\/p>\n

Asnj\u00ebher\u00eb besimtari nuk duhet ta mendoj\u00eb ikjen, apo braktisjen e vendit t\u00eb tij, vet\u00ebm pse po p\u00ebrballet me padrejt\u00ebsi apo sprova. Sepse n\u00ebse ti ik\u00ebn nga rruga e Zotit, ata q\u00eb p\u00ebrhapin prishjen, gjynahet dhe shthurjen, do ta arrijn\u00eb q\u00ebllimin e tyre!<\/p>\n

Ata duan q\u00eb vendi yn\u00eb, toka jon\u00eb, t\u00eb kthehet n\u00eb nj\u00eb pjes\u00eb t\u00eb sundimit t\u00eb s\u00eb keqes absolute.<\/p>\n

Por besimtari i sinqert\u00eb nuk dor\u00ebzohet. Ai q\u00ebndron me durim, me iman dhe me shpres\u00eb tek Allahu, derisa drita e s\u00eb v\u00ebrtet\u00ebs t\u00eb mbizot\u00ebroj\u00eb.<\/p>\n

N\u00eb k\u00ebt\u00eb kontekst, si\u00e7 e kam p\u00ebrmendur edhe jav\u00ebn e kaluar, dhe m\u00eb her\u00ebt, po e p\u00ebrs\u00ebris s\u00ebrish: po p\u00ebrballemi me nj\u00eb fushat\u00eb t\u00eb madhe grabitjeje dhe shkeljeje t\u00eb s\u00eb drejt\u00ebs son\u00eb legjitime mbi Xhamin\u00eb e Madhe.<\/p>\n

S\u00eb fundmi, kemi par\u00eb me tronditje sesi n\u00eb at\u00eb hap\u00ebsir\u00eb \u00ebsht\u00eb prezantuar nj\u00eb tjet\u00ebr projekt, i cili \u2013 n\u00eb m\u00ebnyr\u00eb t\u00eb \u00e7uditshme dhe t\u00eb paturpshme \u2013 \u00ebsht\u00eb paraqitur pa pranin\u00eb e xhamis\u00eb s\u00eb madhe, madje duke u shfaqur sikur xhamia t\u00eb mos ekzistonte m\u00eb n\u00eb horizont.<\/p>\n

Kjo tregon qart\u00eb sa i madh \u00ebsht\u00eb fesadi, sa e thell\u00eb \u00ebsht\u00eb lig\u00ebsia, dhe sa t\u00eb guximsh\u00ebm jan\u00eb b\u00ebr\u00eb ata q\u00eb e p\u00ebrhapin k\u00ebt\u00eb padrejt\u00ebsi n\u00eb vendin ton\u00eb.<\/p>\n

Shteti duhet t\u00eb nd\u00ebrhyj\u00eb urgjentisht! Sepse kjo situat\u00eb po e \u00e7on shoq\u00ebrin\u00eb drejt p\u00ebrplasjes dhe konfliktit.<\/p>\n

K\u00ebto veprime po prishin ekuilibrat fetar\u00eb, ekuilibrat komb\u00ebtar\u00eb dhe po hapin rrug\u00ebn drejt nj\u00eb anarshie sociale q\u00eb askush nuk do ta d\u00ebshironte.<\/p>\n

\u00cbsht\u00eb e papranueshme q\u00eb n\u00eb qytetin e Shkodr\u00ebs t\u00eb prezantohet nj\u00eb projekt ku n\u00eb hart\u00eb fshihet Xhamia e Madhe, simboli historik dhe shpirt\u00ebror i mysliman\u00ebve t\u00eb k\u00ebtij qyteti, aq m\u00eb shum\u00eb q\u00eb vet\u00eb ky projekt ngrihet 100% mbi pron\u00ebn e grabitur vak\u00ebf.<\/p>\n

Prandaj, \u00ebsht\u00eb detyr\u00eb e shtetit dhe e \u00e7do institucioni p\u00ebrgjegj\u00ebs t\u00eb ndal\u00eb menj\u00ebher\u00eb k\u00ebt\u00eb padrejt\u00ebsi..!<\/p>\n

Pa u zgjidhur problemi i pronave n\u00eb k\u00ebt\u00eb vend, nuk ka standarde qytet\u00ebruese!<\/p>\n

Nuk ka standarde qytet\u00ebruese kur shkelet e drejta flagrante e t\u00eb zotit t\u00eb pron\u00ebs! Nuk ka standarde qytet\u00ebruese q\u00eb t\u00eb thuash se ka drejt\u00ebsi, kur njer\u00ebzit vriten p\u00ebr nj\u00eb p\u00ebll\u00ebmb\u00eb tok\u00eb. Sepse ai q\u00eb duhet t\u00eb vendos\u00eb t\u00eb drejtat n\u00eb vend, ose b\u00ebhet pal\u00eb me shejtanin, ose \u00ebsht\u00eb b\u00ebr\u00eb vet\u00eb iblis, ose nuk e ka mendjen fare se \u00e7far\u00eb po ndodh…!\u201d<\/p>\n

Gjat\u00eb dersit t\u00eb tij, Myftiu u ndal edhe te problematik e shumta t\u00eb vak\u00ebfeve t\u00eb ndryshme t\u00eb Myftinis\u00eb Shkod\u00ebr, sidomos brenda zon\u00eb s\u00eb qytetit, ku p\u00ebrmendi zaptimet e vak\u00ebfit n\u00eb Kiras, n\u00eb Rus, tek Bypassi, tek zona e Tabakut, n\u00eb Perash, grabitjen e vak\u00ebfit t\u00eb xhamis\u00eb s\u00eb Garucit, etj.<\/p>\n

 <\/p>\n