{"id":20628,"date":"2026-02-24T10:11:33","date_gmt":"2026-02-24T10:11:33","guid":{"rendered":"https:\/\/myftinia-shkoder.org\/?p=20628"},"modified":"2026-02-24T10:11:33","modified_gmt":"2026-02-24T10:11:33","slug":"kartolina","status":"publish","type":"post","link":"https:\/\/myftinia-shkoder.org\/?p=20628","title":{"rendered":"Kartolina..!"},"content":{"rendered":"

Kartolina..!<\/strong><\/p>\n

Or\u00ebt e Ramazanit jan\u00eb t\u00eb shpejta. Rrjedhin m\u00eb shpejt se rrjedhat e lumenjve. Akrepat e or\u00ebs l\u00ebvizin ndryshe nga \u00e7do muaj e dit\u00eb. Ndoshta se, krejt gj\u00ebrat e \u00e7muara n\u00eb jet\u00eb l\u00ebvizin me shpejt\u00ebsi. Sh\u00ebndeti, rinia, mir\u00ebqenia, rehatia, koha e lir\u00eb, prania e t\u00eb dashurve, vet\u00eb jeta\u2026 \u201cPo p\u00ebr at\u00eb i cili, kur kaloi pran\u00eb nj\u00eb qyteti t\u00eb rr\u00ebnuar p\u00ebrtok\u00eb, tha: \u201cSi mund ta kthej\u00eb n\u00eb jet\u00eb Allahu k\u00ebt\u00eb qytet tani q\u00eb ai \u00ebsht\u00eb i vdekur?!\u201d Dhe Allahu e vdiq at\u00eb p\u00ebr nj\u00ebqind vjet e pastaj e ringjalli dhe e pyeti: \u201cSa koh\u00eb ke ndenjur k\u00ebtu?\u201d – Ai u p\u00ebrgjigj: \u201cNj\u00eb dit\u00eb ose gjysm\u00eb dite<\/em>\u201d. – \u201cJo\u201d – i tha Allahu, \u201cpor ke ndenjur nj\u00ebqind vjet. Shiko ushqimin dhe pijen t\u00ebnde q\u00eb nuk jan\u00eb prishur! Shikoje gomarin t\u00ebnd (si do ta ringjallim) q\u00eb t\u00eb t\u00eb b\u00ebjm\u00eb ty d\u00ebshmi mrekullie p\u00ebr njer\u00ebzit; v\u00ebshtroji eshtrat se si i bashkojm\u00eb e pastaj i veshim me mish!\u201d Kur atij iu b\u00eb e qart\u00eb, ai tha: \u201cTashm\u00eb e di se Allahu \u00ebsht\u00eb i Fuqish\u00ebm p\u00ebr \u00e7do gj\u00eb!\u201d[1]<\/a><\/p>\n

Nj\u00eb dit\u00eb ose gjys\u00ebm dite<\/em>\u2026 N\u00eb fakt, t\u00eb gjith\u00eb, n\u00eb nj\u00eb m\u00ebnyr\u00eb a nj\u00eb tjet\u00ebr e kemi nj\u00eb dit\u00eb ose nj\u00eb gjys\u00ebm dite<\/em>, q\u00eb tashm\u00eb ka shkuar dhe kurr\u00eb nuk kthehet m\u00eb, edhe pse do donim q\u00eb t\u00eb ndodhte e kund\u00ebrta, por\u2026<\/p>\n

M\u00eb merr malli p\u00ebr zanin e Nan\u00ebs e p\u00ebr imazhin q\u00eb fal siguri t\u00eb Gjyshit; p\u00ebr bishtagypin e lyer n\u00eb hoken e boj\u00ebs n\u00eb flet\u00ebn e or\u00ebs s\u00eb bukurshkrimit; p\u00ebr net\u00ebt pa rrym\u00eb elektrike, por t\u00eb zbukuruara me kandilat e dor\u00ebs, kur p\u00ebrjetonim net\u00ebt e Ramazanit pa dilem\u00ebn e numrit t\u00eb rekateve t\u00eb teravis\u00eb dhe, p\u00ebr z\u00ebrin e imamit, q\u00eb thuajse \u00e7do nat\u00eb p\u00ebrs\u00ebriste dhjet\u00eb suret e fundit, aq sa n\u00eb fund t\u00eb k\u00ebtij Muaji Mubarek, ishim b\u00ebr\u00eb t\u00eb gjith\u00eb hafiz\u00eb <\/em>t\u00eb tyre; p\u00ebr pranin\u00eb e Bab\u00ebs n\u00eb sht\u00ebpi dhe z\u00ebrin e tij k\u00ebshillues, n\u00eb koh\u00ebn dhe vendin e duhur, si nj\u00eb bekim i papritur dhe nj\u00eb ndihm\u00eb e pak\u00ebrkuar, por shum\u00eb e munguar; p\u00ebr nj\u00eb pal\u00eb sy q\u00eb t\u00eb ndjekin n\u00eb heshtje duke u lutur p\u00ebr ty, pa hile, pa zugzage, pa smir\u00eb; p\u00ebr nj\u00eb M\u00ebsues t\u00eb urt\u00eb q\u00eb flet e ligj\u00ebron esenc\u00ebn e librave dhe largpam\u00ebsin\u00eb e autor\u00ebve t\u00eb shkuar, si receta jete, q\u00eb t\u00eb nevojiten n\u00eb \u00e7do hap; p\u00ebr but\u00ebsin\u00eb dhe p\u00ebrkujdesjen e Nan\u00ebs, q\u00eb t\u00eb bekon pa fjal\u00eb e t\u00eb uron me v\u00ebshtrimet e zemr\u00ebs, aq sa mjafton p\u00ebr t\u00eb hapur shtigjet e jet\u00ebs, q\u00eb asgj\u00eb dhe askush nuk mund t\u2019i hap\u00eb, ve\u00e7 duas\u00eb s\u00eb Saj\u2026<\/p>\n

T\u00eb h\u00ebn\u00ebn e 23 shkurtit 2026, m\u00eb kishin ftuar p\u00ebr nj\u00eb iftar, m\u00eb t\u00eb ve\u00e7antin e krejt Muajit\u2026 Iftari me jetim\u00ebt<\/em>, q\u00eb organizonte Fondacioni \u201cMir\u00ebsia\u201d, ishte nj\u00eb ftes\u00eb, q\u00eb nuk mund ta refuzoja, mbi t\u00eb gjitha p\u00ebr nevoj\u00ebn time p\u00ebr t\u00eb zbutur ashp\u00ebrsin\u00eb e zemr\u00ebs n\u00eb k\u00ebto dit\u00eb t\u00eb para t\u00eb Han\u00ebs s\u00eb Bekuar\u2026 Nj\u00eb burr\u00eb iu ankua t\u00eb D\u00ebrguarit t\u00eb Allahut p\u00ebr ashp\u00ebrsin\u00eb e zemr\u00ebs s\u00eb tij. E udh\u00ebzoi: \u201cF\u00ebrkoje kok\u00ebn e jetimit dhe ushqeje skamnorin\u201d[2]<\/a>\u2026<\/p>\n

E fal\u00ebnderova pa mas\u00eb v\u00ebllain tim t\u00eb zellsh\u00ebm p\u00ebr veprat e mira n\u00eb komunitet, z. Korab Kaja, si dhe imamin pun\u00ebtor e t\u00eb pandalsh\u00ebm n\u00eb t\u00ebrheqjen e projekteve me dobi, z. Shk\u00eblqim Sykaj, p\u00ebr organizimin dhe teksa, q\u00ebndroja bri tyre, v\u00ebreja me v\u00ebmendje fytyrat e qeshura t\u00eb f\u00ebmij\u00ebve n\u00eb qend\u00ebr t\u00eb sall\u00ebs, teksa haresh\u00ebm, p\u00ebrjetonin momente t\u00eb g\u00ebzuara t\u00eb rrethuar nga ngroht\u00ebsia e t\u00eb gjith\u00ebve\u2026<\/p>\n

Gjithandej tullumbace, q\u00eb fluturonin si balona shprese, t\u00eb bekuara nga duart e f\u00ebmij\u00ebve t\u00eb ftuar, q\u00eb n\u00eb atmosfer\u00ebn e k\u00ebsaj Nate t\u00eb sh\u00ebnuar, po p\u00ebrjetonin nj\u00eb drit\u00eb m\u00eb shum\u00eb n\u00eb q\u00ebniet e tyre t\u00eb brishta.., drit\u00eb Ramazani<\/em>, q\u00eb na fal t\u00eb gjith\u00ebve, i madh e i vog\u00ebl, m\u00ebshir\u00eb e but\u00ebsi hyjnore, p\u00ebr t\u00eb cilat kemi p\u00ebrher\u00eb nevoj\u00eb, si jetim\u00eb zamani<\/em>\u2026<\/p>\n

U ngrita t\u00eb flas. Kisha shum\u00eb p\u00ebr t\u00eb th\u00ebn\u00eb e, gati-gati nuk dija nga t\u2019ia nis. Nuk doja ta ndal zhurm\u00ebn e z\u00ebrave t\u00eb tyre, as loj\u00ebn e tullumbaceve, as vrapimin e tyre na hap\u00ebsirat e sall\u00ebs s\u00eb madhe, ku ishim mbledhur\u2026<\/p>\n

Doja t\u00eb thoja m\u00eb shum\u00eb se\u00e7 mund t\u00eb p\u00ebrkufizohet n\u00eb rreshta e, aq m\u00eb pak se\u00e7 mund t\u00eb ndjehet realisht n\u00eb at\u00eb pozit\u00eb, por\u2026 me lejen e mikut tim t\u00eb mir\u00eb, q\u00eb kishte ardhur nga Tirana p\u00ebr k\u00ebt\u00eb dark\u00eb iftari, vendosa t\u00eb ndaj me f\u00ebmij\u00ebt, nj\u00eb pjes\u00eb t\u00eb dhuratave, q\u00eb Vakfi Turk i Jetimit, kishte p\u00ebrgatitur n\u00eb bashk\u00ebpunim me Fondacionin \u201cMir\u00ebsia\u201d.<\/p>\n

O Zot, \u00e7far\u00eb emocioni e k\u00ebnaq\u00ebsie t\u00eb v\u00ebshtrosh n\u00eb fytyrat e tyre, si pasqyra t\u00eb nd\u00ebrgjegjes, ku mund t\u00eb shoh\u00ebsh veten e t\u00eb v\u00ebresh shum\u00eb t\u00eb path\u00ebna, q\u00eb je n\u00eb koh\u00eb t\u00eb korrigjosh\u2026<\/p>\n

O Zot, \u00e7far\u00eb emocioni t\u00eb f\u00ebrkosh kokat e tyre, teksa zgjat dor\u00ebn me nj\u00eb dhurat\u00eb simbolike, t\u00eb mbushur me cop\u00ebza zemre, q\u00eb rrahin akoma dashuri e p\u00ebrkujdesje p\u00ebr jetimin<\/em> e begatuar me nofk\u00ebn e Pejgamberit alejhis-selam\u2026<\/p>\n

Kartolina\u2026<\/p>\n

Brenda \u00e7do pakoje, kishte edhe nj\u00eb kartolin\u00eb, q\u00eb ma afruan ta lexoj. Kishte nj\u00eb dedikim, t\u00eb shoq\u00ebruar e nj\u00eb lutje, ku shkruhej:<\/p>\n

\u201cF\u00ebmij\u00eb i dashur,<\/p>\n

Ti je shum\u00eb i \u00e7muar p\u00ebr ne.<\/p>\n

Sot t\u00eb kemi d\u00ebrguar nj\u00eb dhurat\u00eb, me shpres\u00ebn q\u00eb kur ta marr\u00ebsh n\u00eb dor\u00eb, t\u00eb t\u00eb b\u00ebj\u00eb t\u00eb lumtur.<\/p>\n

Sepse kur ti je i lumtur, edhe ne jemi t\u00eb lumtur. Kur fytyra jote buz\u00ebqesh, buz\u00ebqesh edhe fytyra jon\u00eb.<\/p>\n

Mbaj edhe p\u00ebr ne nj\u00eb vend n\u00eb zemr\u00ebn t\u00ebnde dhe na p\u00ebrfshi edhe n\u00eb lutjet e tua!<\/p>\n

T\u00eb duam shum\u00eb dhe do t\u00eb vazhdojm\u00eb t\u00eb t\u00eb duam gjithmon\u00eb\u2026<\/p>\n

YET\u0130M VAKFI\u201d<\/p>\n

Nj\u00eb kartolin\u00eb, q\u00eb p\u00ebrmbledh shum\u00eb\u00e7ka n\u00eb pak gj\u00eb, q\u00eb secili prej nesh mund t\u00eb arrijm\u00eb ta realizojm\u00eb, duke gjurmuar p\u00ebr nj\u00eb jetim, duke u kujdesur p\u00ebr edukimin e tij, p\u00ebr nevojat ditore, p\u00ebr t\u00eb mos i munguar asgj\u00eb, p\u00ebrtej faktit se, edhe krejt bot\u00ebn po t\u2019ia japim, nuk e kompensojm\u00eb as edhe nj\u00eb v\u00ebshtrim m\u00ebshirues t\u00eb t\u00eb Shtrenjtit Bab\u00eb, as edhe nj\u00eb fjal\u00eb plot bekim nga zemra e tij, as edhe nj\u00eb buzq\u00ebqeshje miradie nga fytyra e tij, q\u00eb tashm\u00eb ka per\u00ebnduar, si dielli i k\u00ebsaj nate, q\u00eb na b\u00ebri t\u00eb gjith\u00ebve bashk\u00eb, n\u00eb nj\u00eb p\u00ebrjetim t\u00eb mrekulluesh\u00ebm, n\u00eb kornizat e nj\u00eb kartoline<\/em>\u2026<\/p>\n

\n

Imam Muhamed B. Sytari<\/strong><\/p>\n

Shkod\u00ebr, m\u00eb 24 shkurt 2026<\/em><\/p>\n

\n

\n

\n

[1]<\/a> Kur\u2019ani, El-Bekare: 259.<\/p>\n

[2]<\/a> Transmetuar nga Imam Ahmedi, nga sahabiu Ebu Hurejra (Allahu qoft\u00eb i k\u00ebnaqur prej tij).<\/p>\n