{"id":21205,"date":"2026-04-27T13:47:24","date_gmt":"2026-04-27T13:47:24","guid":{"rendered":"https:\/\/myftinia-shkoder.org\/?p=21205"},"modified":"2026-04-27T17:23:36","modified_gmt":"2026-04-27T17:23:36","slug":"myftiu-ruaju-mos-te-kapi-kjo-lutje","status":"publish","type":"post","link":"https:\/\/myftinia-shkoder.org\/?p=21205","title":{"rendered":"Myftiu: \u201cRuaju, mos t\u00eb kapi kjo lutje!\u201d"},"content":{"rendered":"

Myftiu: \u201cRuaju, mos t\u00eb kapi kjo lutje!\u201d<\/strong><\/p>\n

Dit\u00ebn e h\u00ebn\u00eb, m\u00eb 27 prill 2026, n\u00ebp\u00ebrmjet kanalit t\u00eb tij n\u00eb youtube, Imam Muhamed B. Sytari, Myfti i Zon\u00ebs Shkod\u00ebr, risolli n\u00eb v\u00ebmendje nj\u00eb plag\u00eb t\u00eb pambyllur akoma n\u00eb shoq\u00ebrin\u00eb shqiptare q\u00eb \u00ebsht\u00eb grabitja e pron\u00ebs s\u00eb tjetrit dhe vuajtjet e pronar\u00ebve legjitim\u00eb p\u00ebr t\u00eb marr\u00eb hakun e tyre n\u00ebp\u00ebrmjet certifikimit t\u00eb pron\u00ebs private q\u00eb i jep mund\u00ebsi edhe zhvillimit t\u00eb saj.<\/p>\n

Myftiu solli n\u00eb v\u00ebmendjen rastin e sahabiut t\u00eb nderuar, Hz. Said ibn Zejd (r.a), t\u00eb cilin e akuzuan nj\u00eb dit\u00eb se kishte grabitur nj\u00eb tok\u00eb.<\/p>\n

I gjendur p\u00ebrball\u00eb gjyqtarit, sahabiu i nderuar u shpreh: \u201cT\u00eb grabis un\u00eb nj\u00eb tok\u00eb, nd\u00ebrkoh\u00eb q\u00eb kam d\u00ebgjuar at\u00eb fjal\u00eb t\u00eb madhe nga i D\u00ebrguari i Allahut (a.s)?!\u201d Dhe kur gjyqtari e pyeti p\u00ebr hadithin n\u00eb fjal\u00eb ai tha: I D\u00ebrguari i Allahut (a.s) ka th\u00ebn\u00eb: \u201cAi q\u00eb grabit, qoft\u00eb edhe nj\u00eb p\u00ebll\u00ebmb\u00eb tok\u00eb, ajo do t\u2019i lidhet sa shat\u00eb fishi i tok\u00ebs n\u00eb qaf\u00ebn e tij n\u00eb dit\u00ebn e kiametit\u201d, pra si shenj\u00eb nd\u00ebshkimi i madh nga Zoti i gjith\u00ebsis\u00eb p\u00ebr k\u00ebt\u00eb padrejt\u00ebsi t\u00eb madhe n\u00eb hak t\u00eb pronarit legjitim.<\/p>\n

Myftiu t\u00ebrhoqi v\u00ebmendjen se akoma sot, 36 vite pas r\u00ebnies s\u00eb komunizmit, n\u00eb shoq\u00ebrin\u00eb shqiptare fenomeni i v\u00ebllavrasjes, i ngat\u00ebrresave dhe i p\u00ebrplasjeve shpesh edhe t\u00eb dhunshme p\u00ebr shkak t\u00eb pron\u00ebsis\u00eb dhe grabitjes s\u00eb pron\u00ebs legjitime, \u00ebsht\u00eb nj\u00eb plag\u00eb e cila e r\u00ebndon p\u00ebrher\u00eb e m\u00eb shum\u00eb \u00e7\u00ebshtjen e siguris\u00eb komb\u00ebtare, ekuilibrat e paqes sociale dhe cil\u00ebsin\u00eb e vlerave qytet\u00ebruese q\u00eb duhet t\u00eb d\u00ebshmohen n\u00eb shoq\u00ebrin\u00eb ton\u00eb.<\/p>\n

Myftiu i b\u00ebri thirrje t\u00eb gjith\u00eb atyre q\u00eb kan\u00eb shkelur n\u00eb pron\u00ebn e tjetrit, q\u00eb kan\u00eb grabitur qoft\u00eb edhe nj\u00eb p\u00ebll\u00ebmb\u00eb tok\u00eb apo kan\u00eb falsifikuar certifikatat e pron\u00ebsis\u00eb, k\u00ebtu apo atje, q\u00eb dera e pendimit \u00ebsht\u00eb akoma e hapur dhe se \u00e7do njeri sado i paudh\u00eb q\u00eb t\u00eb jet\u00eb e ka nj\u00eb moment kthese dhe reflektimi p\u00ebr t\u2019u kthyer tek e drejta.<\/p>\n

Nj\u00ebkoh\u00ebsisht, Myftiu theksoi se prona legjitime \u00ebsht\u00eb e shenjt\u00eb dhe se kushdo q\u00eb p\u00ebrpiqet n\u00eb k\u00ebt\u00eb rrug\u00ebtim ka bekimet e Zotit dhe mb\u00ebshtetjen e Tij.<\/p>\n

K\u00ebt\u00eb mesazh, Myftiu e lidhi edhe me lutjen q\u00eb sahabiu i nderuar, Said ibn Zejd b\u00ebri kund\u00ebr personit q\u00eb e kishte akuzuar padrejt\u00ebsisht p\u00ebr grabitjen e pron\u00ebs me \u00e7\u2019rast tha: \u201cO Zoti im, n\u00ebse kjo grua q\u00eb m\u00eb akuzon \u00ebsht\u00eb g\u00ebnjeshtare verboja syt\u00eb dhe merrja shpirtin n\u00eb tok\u00ebn e saj\u201d. Nuk kaloi shum\u00eb dhe ajo grua u verbua dhe nj\u00eb dit\u00eb teksa l\u00ebvizte n\u00eb bah\u00e7en e saj ra n\u00eb nj\u00eb grop\u00eb dhe vdiq. Ajo shpesh, pas verbimit, thoshte: \u201cM\u00eb ka z\u00ebn\u00eb duaja e Said ibn Zejdit!\u201d.<\/p>\n

Myftinia Shkod\u00ebr, prej dekadash po p\u00ebrballet me padrejt\u00ebsi t\u00eb shumta n\u00eb k\u00ebt\u00eb drejtim, ku akoma qeverit\u00eb e k\u00ebtij tranzicioni 36 vje\u00e7ar, nuk kan\u00eb arritur t\u00eb sistemojn\u00eb katrahur\u00ebn e padrejt\u00ebsive dhe abizimit flagrant me \u00e7\u00ebshtjen e pron\u00ebs.<\/p>\n

Rast i patoleruesh\u00ebm dhe shum\u00eb shqet\u00ebsues p\u00ebr bashk\u00ebsin\u00eb muslimane t\u00eb Shkodr\u00ebs, \u00ebsht\u00eb grabitja spektakolare e vak\u00ebfit t\u00eb Fush\u00eb \u00c7el\u00ebs n\u00eb zem\u00ebr t\u00eb Shkodr\u00ebs, ku prej koh\u00ebsh kan\u00eb nisur punimet p\u00ebr nj\u00eb nd\u00ebrtim, q\u00eb paradoksalisht dhe jasht\u00eb \u00e7do logjike drejt\u00ebsie, vet\u00eb institucionet e konsiderojn\u00eb si arritje mbi arritjet!?<\/p>\n

M\u00eb posht\u00eb linku i ligj\u00ebrat\u00ebs:<\/p>\n