{"id":2756,"date":"2017-08-11T20:36:47","date_gmt":"2017-08-11T20:36:47","guid":{"rendered":"http:\/\/myftinia-shkoder.org\/?p=2756"},"modified":"2017-08-11T20:36:47","modified_gmt":"2017-08-11T20:36:47","slug":"lutje-masive-per-pendim-dhe-falje-ne-te-gjitha-xhamite-e-shkodres","status":"publish","type":"post","link":"https:\/\/myftinia-shkoder.org\/?p=2756","title":{"rendered":"Lutje masive p\u00ebr pendim dhe falje n\u00eb t\u00eb gjitha xhamit\u00eb e Shkodr\u00ebs"},"content":{"rendered":"

Sikurse u lajm\u00ebrua edhe m\u00eb par\u00eb, dit\u00ebn e xhuma, m\u00eb 11 gusht 2017, n\u00eb t\u00eb gjitha xhamit\u00eb e Shkodr\u00ebs tema e hytbes s\u00eb k\u00ebsaj jave u p\u00ebrqendrua tek aktualiteti dhe realitetet e p\u00ebrditshme shqiptare, ku p\u00ebrhapja e veseve, harameve dhe imoralitetit p\u00ebrb\u00ebn nj\u00eb shqet\u00ebsim t\u00eb madh.<\/p>\n

Nga xhamia e Parruc\u00ebs, Myftiu i Shkodr\u00ebs Imam Muhamed B. Sytari dha nj\u00eb mesazh publik drejtuar krejt qytetar\u00ebve, p\u00ebr t’u kthyer nga besimi dhe feja, p\u00ebr t\u00eb hapur nj\u00eb faqe t\u00eb re n\u00eb marr\u00ebdh\u00ebnie me Zotin.<\/p>\n

“Hapni syt\u00eb dhe pendohuni, kthehuni nga Zoti me nj\u00eb pendim t\u00eb pakthyesh\u00ebm dhe deklaroni paqtimin me Zotin e botrave, p\u00ebr t\u00eb d\u00ebshmuar kthimin e begatis\u00eb, qet\u00ebsis\u00eb, siguris\u00eb, mir\u00ebqenies e harmonis\u00eb n\u00eb mes nesh!<\/p>\n

Po humbet besimi n\u00eb Zot, frika e Tij! Po kthehet e keqja n\u00eb moral dhe morali n\u00eb prapambejtje! Po paragjykohen bijat tona p\u00ebr hixhabin e besimit dhe djemt\u00eb tan\u00eb p\u00ebr ruajtjen e nderit dhe distancimin nga haramet dhe ndalesat e shumta, q\u00eb sot shiten si liri e nevoj\u00eb e koh\u00ebs!<\/p>\n

Po n\u00ebp\u00ebrk\u00ebmbet Zoti, feja dhe prindi! Po mohohet Zoti dhe po k\u00ebrkohet t\u00eb heshten minaret e besimit! Po vriten nana dhe baba, po mbytet gruaja dhe f\u00ebmija, po bekohet shthurrja dhe devijimi n\u00eb em\u00ebr t\u00eb vlerave evropiane! Vlerat tona ne i peshojm\u00eb me Kur\u2019an dhe me udh\u00ebzimet e Hz. Muhammedit (a.s); po peshuan, mir\u00eb se t\u00eb vijn\u00eb, e n\u00ebse jo, nuk hyjn\u00eb n\u00eb syt\u00eb tan\u00eb, as duhet t\u00eb lejohet p\u00ebrhapja e tyre n\u00eb mes nesh! Vlerat i \u00e7mojm\u00eb me peshoren e besimit ton\u00eb, jo \u00e7far\u00eb na jepet si kuti e dyllosur q\u00eb duhet pranuar symbyllur!<\/p>\n

Zgjohuni dhe hapni syt\u00eb! Mos lejoni q\u00eb mbetjet e t\u00eb tjer\u00ebve t\u00eb na shiten p\u00ebr pasuri e nder! Mos lejoni q\u00eb f\u00ebmij\u00ebt t\u2019jua marrin p\u00ebr duarsh e t\u2019jua konvertojn\u00eb n\u00eb djaj t\u00eb vegj\u00ebl, q\u00eb nes\u00ebr do ta shkat\u00ebrrojn\u00eb Shqip\u00ebrin\u00eb, m\u00eb shum\u00eb se \u00e7\u2019\u00ebsht\u00eb shkat\u00ebrruar e sfilitur!
\nNe jemi musliman\u00eb; e kemi t\u00eb shenjt\u00eb fen\u00eb, jet\u00ebn, mendjen, nderin dhe pasurin\u00eb! E kemi t\u00eb shenjt\u00eb ta nd\u00ebrtojm\u00eb jet\u00ebn me vlerat e besimit ton\u00eb, sikurse e kemi t\u00eb shenjt\u00eb ta ndalojm\u00eb t\u00eb keqen dhe ta mbrojm\u00eb t\u00eb mir\u00ebn me krejt fuqit\u00eb q\u00eb kemi!<\/p>\n

K\u00ebto dit\u00eb kemi d\u00ebshmuar krime dhe vrasje, padrejt\u00ebsi e zaptime, jemi p\u00ebrballur me zullume t\u00eb panum\u00ebrta n\u00eb sakrific\u00ebn ton\u00eb p\u00ebr ruajtjen dhe zhvillimin e pronave tona legjitime, si: n\u00eb Zdralej, Zogaj, Qaf\u00eb, Dudas e shum\u00eb e shum\u00eb vende t\u00eb tjera, ku shohim neglizhenc\u00ebn e Bashkis\u00eb, Prokuroris\u00eb, Gjykat\u00ebs, por jo vet\u00ebm, p\u00ebr t\u00eb \u00e7uar n\u00eb vend nj\u00eb hak t\u00eb n\u00ebp\u00ebrk\u00ebmbur prej dekadash..!?<\/p>\n

Po ndjekim me shqet\u00ebsim t\u00eb madh p\u00ebrhapjen e zjarreve p\u00ebrreth Shkodr\u00ebs dhe mbar\u00eb vendit, that\u00ebsir\u00ebn e k\u00ebsaj stine, q\u00eb e tejkalon natyr\u00ebn e zakonshme t\u00eb ver\u00ebs n\u00eb vendin ton\u00eb, munges\u00ebn e reshjeve begatuese, shoq\u00ebruar me p\u00ebrhapjen n\u00eb mas\u00eb t\u00eb alkoolit, muzik\u00ebs shurdhuese pa asnj\u00eb kriter disiplinues, lakuriq\u00ebsin\u00eb dhe p\u00ebrhapjen e imoralitetit, tradh\u00ebtit\u00eb bashk\u00ebshortore dhe divorcet p\u00ebrher\u00eb e n\u00eb rritje p\u00ebr shkak t\u00eb devijimit nga besimi dhe morali i fes\u00eb, abortet abuzive dhe p\u00ebrhapjen e drog\u00ebrave t\u00eb ndryshme, kultivimin e bim\u00ebve narkotike dhe shtimin e fajdeve, p\u00ebrhapjen e injoranc\u00ebs dhe veshjen e saj me kollare e kostum, por jo vet\u00ebm kaq!”-, tha nd\u00ebr t\u00eb tjera Myftiu.<\/p>\n

Sikurse ishte lajm\u00ebruar, n\u00eb fund t\u00eb k\u00ebsaj hytbeje, u b\u00eb edhe lutja masive p\u00ebr zbritjen e shiut dhe begatimin e vendit.<\/p>\n