Në xhamitë e Shkodrës vijojnë me sukses kurset verore

Në xhamitë e Shkodrës vijojnë me sukses kurset verore

Në xhamitë e qytetit dhe të fshatrave po vijojnë me një atmosferë të ngrohtë dhe pjesëmarrje të kënaqshme kurset fetare verore, të organizuara nga Sektori i Arsimit pranë Myftinisë Shkodër, të cilat synojnë edukimin fetar dhe moral të fëmijëve e të rinjve gjatë pushimeve verore.

Gjatë këtyre ditëve, nxënësit po mësojnë leximin e Kur’anit Famëlartë, njohuritë bazë të fesë islame, moralin dhe edukatën islame, duke i shoqëruar mësimet edhe me aktivitete edukative e argëtuese, vizita në objekte kulturore dhe historike që e bëjnë procesin mësimor më tërheqës.

Në kuadër të ndjekjes së ecurisë së këtyre kurseve, gjatë kësaj jave, ditën e xhuma, pas iqindisë më 24 korrik 2026 drejtuesi i Arsimit në Myftininë Shkodër, teologu Arben Halluni, zhvilloi takimin e radhës dhe një vizitë në kursin fetar veror pranë xhamisë së Ganjollës. Ai u njoh nga afër me zhvillimin e mësimit nga H. Erion Hasmegaj dhe mesueset Denada dhe Dajana Duli, bashkëbisedoi me nxënësit, ku i përgëzoi për angazhimin dhe i inkurajoi fëmijët që ta shfrytëzojnë këtë periudhë për të fituar sa më shumë dije dhe vlera edukative islame.

Krahas kursit të Ganjollës, kurset verore po zhvillohen me sukses edhe në xhamitë Gur i Zi, Kosmaçë, Rragam, Luarzë, Kuç, Shkjezë, Rrushkull, Mes-Myselim, Dudas si edhe në xhami të tjera, ku çdo ditë mbizotëron një atmosferë mësimi, bashkëpunimi dhe përkushtimi.

Myftinia Shkodër shpreh mirënjohje për imamët, mësuesit dhe të gjithë ata që po kontribuojnë në organizimin dhe mbarëvajtjen e këtyre kurseve verore , duke u uruar nxënësve suksese dhe një verë të mbushur me dije, edukatë dhe vlera të dobishme