Përmbyllet me emocione dhe festime edicioni i 4-ët i kursit veror “Buz’qesh”

Përmbyllet me emocione dhe festime edicioni i 4-ët i kursit veror “Buz’qesh”

Në Xhaminë “Ebu Bekër”, për gjatë 3 javëve u zhvillua kursi veror intensiv “Buz’qesh” 2025, edicioni i 4-ët, me pjesëmarrjen e rreth 90 fëmijëve të moshave të ndryshme.

Ashtu si vitin e kaluar, Myftinia Shkodër përmes sektorit të arsimit, arriti që edhe këtë vit të gërshetojë me sukses edukimin islam me argëtimin.

Qëllimi kryesor i këtij kursi veror intensiv, krahas argëtimit të fëmijëve ishte kombinimi i përsosur mes mësimit dhe argëtimit, duke siguruar një eksperiencë të paharrueshme për ta.

Si përherë, gjatë këtyre tre javëve nuk munguan veprimtaritë krijuese vetjake dhe të ndara në katër grupe, si dhe lojërat zbavitëse të shumëllojshme, si dhe ekskursione, që u zhvilluan në ditën e fundit të tij, në Kompleksin “Zmijani”.

Në ceremoninë e mbylljes, më 4 korrik 2025, teologu Arben Halluni, drejtues i arsimit, pranë Myftinisë Shkodër ka falënderuar fillimisht pjesëmarrjen e rregullt të fëmijëve, prindërit e tyre dhe në mënyrë të veçantë bashkëpunimin e teologes, znj. Zamira Bushati, psikologen znj. Almeda Tusha dhe asistentet vullnetare, të cilat ndihmuan në realizimin e këtij aktiviteti të dobishëm arsimor, edukativ dhe argëtues.

Për këtë bashkëpunim të vyer të tyre Myftinia Shkodër u dha nga një certifikatë vlerësimi dhe mirënjohjeje, ndërsa fëmijëve pjesëmarrës nga një dhuratë simbolike.

Në fund të kësaj ceremonie pati urime dhe përqafime të përzemërta midis mësuesve dhe fëmijëve.