U zhvillua trajnimi me temë: “Diskursi islam dhe relaiteti i sotëm”
Paraditën e së enjtes, më 28 gusht 2025, Myftinia Shkodër kishte kënaqësinë të kishte të ftuar për trajnimin e një grupi imamësh, Kryetarin e Komunitetit Musliman Shqiptar në Arizona, Imam Didmar Faja.
Temë e këtij trajnimi ishte “Diskursi islam dhe realiteti i sotëm”, ku ligjëruesi pati mundësinë të shpalosë mendimet dhe idetë e tij të ndërthurura me eksperiencat personale dhe shembuj nga realiteti amerikan dhe perëndimor.
Në krye të herës, Myftiu i Shkodrës, Imam Muhamed B. Sytari shprehu vlerësimet dhe mirënjohjen e tij për të nderuarin Imam Didmar Faja, sikurse theksoi se aktivitete të tilla kanë një vlerë të veçantë për pjesëmarrësit dhe përtej tyre.
Në ligjërimin e tij, Imam Didmar Faja u ndal në disa stacione, nëpërmjet të cilave vuri theksin te roli i madh që ka imami në shoqëri, si ndërtues, edukator dhe mbrojtës i vlerave më të mira fetare dhe kombëtare.
Imami i nderuar u ndal te rëndësia, që ka ligjërimi bazuar në dije, urtësi dhe mbi të gjitha në ruajtjen dhe kultivimit e harmonisë dhe vëllazërisë në mesin e njerëzve pa përjashtim.
U theksua domosdoshmëria e shfrytëzimit të rrjeteve sociale, medies dhe teknologjisë për nxjerrjen e mesazhit islam jashtë mureve të xhamisë, e cila mbetet djep i pazëvendësueshëm në edukimin e njerëzve me moralin e besimit e të fesë, në ruajtjen e tabanit dhe trashigimisë së baballarëve dhe brezave që kaluan.
Imami i nderuar u ndal edhe tek imazhi i imamit si njeri shembull në shoqëri i veshur me petkun e moralit, virtytit, durimit, sakrificës, përkushtimit dhe urtësisë.
Gjatë këtij trajnimi imamët e pranishëm patën mundësi të diskutonin bashkërisht me të nderuarin Imam Ditmar Faja duke ndarë përvojat e tyre, shqetësimet e ndryshme dhe idetë rreth boshtit të këtij takimi.
Në fund të këtij trajnimi, imamëve të pranishëm iu shpërnda edhe një dhuratë simbolike nga UICA (United Islamic Center of Arizona) me urimet më të mira për mbarësi dhe suksese në punën dhe misionin e tyre fisnik.
