Myftiu i Shkodrës: “Gaza pasqyrë e dinjitetit njerëzor!”
Ditën e xhuma, më 29 gusht 2025, nëpërmjet dersit të ditës së xhuma në xhaminë e Plumbit, Myftiu i Shkodrës, Imam Muhamed B. Sytari u ndal tek rëndësia që ka ndjekja e gjurmëve dhe traditave të Hz. Muhammedit (a.s).
Ndër të tjera theksoi: “Tashmë që kemi hyrë në muajin e bekuar e të begatë të përkujtimit të Lindjes së Hz. Muhammedit (a.s) është obligim për gjithsecilin prej nesh të rikthehemi me vëmendjen dhe dashurinë tonë tek përkujtimi përherë e më shumë i gjurmëve dhe traditave të Hz. Muhammedit (a.s), për ta pasur atë si shembull në jetën tonë të përditshme”.
Myftiu u ndal tek mëshira e Hz. Muhammedit (a.s) për gratë në veçanti, për fëmijët dhe për vejushat me jetimët e tyre. Ai theksoi se dekadave të fundit bota po përballet përherë e më tepër me propagandat shurdhuese feministe të cilat e ngrenë zërin për të drejtat e grave dhe fëmijëve, ndërkohë që në Islam, që para prej 15 shekujsh Hz. Muhammedi (a.s) urdhëronte: “Përkujdesuni për gratë”, sikurse thoshte: “Kijeni frikë Allahun në gratë tuaja sepse ju i keni marrë ato me besën e Allahut”, sikurse thoshte: “Mos e godit fytyrën as mos e poshtëro…”, sikurse thoshte: “Mos i goditni robëreshat e Allahut”, sikurse thoshte: “Besimtarët me besimin më të plotë janë ata që kanë mirësjelljen më të mirë dhe më të mirët ndër ju janë më të mirët me gratë e tyre”.
Nëpërmjet këtyre haditheve kuptojmë përherë e më tepër pozitën e lartë që Islami i ka kushtuar grave ndërkohë sot në Gaza shohim se si dhunohen, vriten dhe abuzohet me gratë e pafajshme, me plaka të pafajshme, me gra të pambrojtura, me plaka të pambrojtura, me vajza të pambrojtura, me foshnje të pambrojtura! E nga kjo pikë, nga këtu pyes: ku është bota e civilizuar që thërret prej kohësh për të drejtat e gruas?!”
Po ashtu u ndal tek mëshira për fëmijët dhe theksoi se nëpërmjet mediave po shohim mizori të papërshkrueshme, bombardime, vrasje me gjakftohtësi, djegie dhe shkatërrim të jetës dhe të çdo gjallese në Gaza, veçanërisht të fëmijëve të pambrojtur e të pafajshëm, ndërkohë që njerëzimi është dehur dhe nuk arrin të ndalë dot këtë llahtari të papërshkrueshme dhe të pashembullt të historisë së njerëzimit.
Myftiu theksoi gjithashtu: “Në Gaza po shohim gjyshër e prindër me copa trupash pajetë të nipërve, mbesave, djemve dhe vajzave të tyre që mbushin ekranet e njerëzimit në komat e dinjitetit. Në gaza ka sot jetim-burra, më burra se meshkujt e ekraneve dhe hipokrizia e pamundësisë për t’i ardhur në ndihmë një popullate të tërë të izoluar, që mbi të cilën ushtrohet terror dhe shfarosje sistematike. Prej dekadash në Gaza dhe në Palestinë ushtrohet gjenocid dhe barbari, terror dhe kasaphane një kohë që thirrjet për paqe e mëshirë, vëllazërim, tolerancë e ngjashëm mbeten tituj konferencash e demonstratash e peticionesh të firmosur gjithandej në botë nga njerëz fisnik, të paaftë për të bërë më shumë se kaq!”
Myftiu e mbylli dersin e kësaj jave me citimin e nobelistit George Bernard Shaw (1856 – 1950), i cili thoshte: “Jam i bindur se po të ishte Hz. Muhammedi në mesin tonë, do i zgjidhte problemet e botës duke pirë një filxhan kafe!”