Imam Didmar Faja mbajti hytben e xhumasë në xhaminë e Plumbit
Me ftesë të Myftiut të Shkodrës, Imam Muhamed B. Sytari, ditën e xhuma, më, 29 gusht 2025, i ftuar për të mbajtur hytben e xhumasë në xhaminë e Plumbit, ishte Kryetari i Komunitetit Musliman Shqiptar në Arizona, Imam Didmar Faja.
Gjatë hytbes së tij, ai u ndal te vlera dhe rëndësia që ka përkujtimi i Lindjes së Hz. Muhammedit (a.s), si burim mëshire dhe udhëzim i përhershëm për çdo besimtar deri në ditën e fundit.
Ai hodhi dritë mbi ajete të ndryshme kur’anore dhe hadithe të Pejgamberit (a.s) nëpërmjet të cilave besimtarët tërhiqen drejt vlerës dhe madhështisë që ka dërgesa e Hz. Muhammedit (a.s), si mëshirë e dhuruar.
Ndër të tjera, Imam Didmar Faja tha: “Dashuria e sinqertë për Profetin (a.s) i ngriti sahabët nga njerëz të thjeshtë e të pa orientuar, në prijës të botës me drejtësi, moral dhe besim të patundur.
Edhe ne sot, nëse e mbjellim dashurinë për Profetin (a.s) në zemrat tona dhe e pasqyrojmë atë në jetën e përditshme, mund të transformojmë shoqëritë tona, që shpesh mbyten në padrejtësi dhe imoralitetet që u serviren.
Dijetarët kanë theksuar se ndjekja e Profetit (a.s) fillon me njohjen e thellë të jetës dhe karakterit të tij, pasohet nga dashuria e sinqertë ndaj tij, dhe kur kjo dashuri rrënjoset në zemër, ajo pasohet me ndjekjen e shembullit të tij në jetën e përditshme.”
Hytbeja e xhumasë u ndoq me vëmendje nga besimtarë të shumtë, që kishin tejmbushur xhaminë e Plumbit dhe të cilët patën mundësinë të takoheshin me Imamin e nderuar në përfundim të ceremonisë së kësaj xhumaje.
