Ekspozita “Ngjyrat e besimit” në Qendrën Kulturore Barbullush

Ekspozita “Ngjyrat e besimit” në Qendrën Kulturore Barbullush

Në ambientet e Qendrës Kulturore, pranë xhamisë Barbullush, Myftinia Shkodër, përmes sektorit të arsimit, organizoi paraditen e së mërkurës, më 24 dhjetor 2025, ekspozitën artistike “Ngjyrat e besimit”, me punime pikture të realizuara nga nxënësit e kurseve fetare të kësaj qendre.

Aktiviteti u çel me një përshëndetje nga drejtuesi i Arsimit pranë Myftinisë Shkodër, teologu Arben Halluni, i cili falënderoi të gjithë pjesëmarrësit për praninë e tyre, nxënësit për përkushtimin dhe kreativitetin e treguar, mësuesit për udhëheqjen dhe organizimin e vazhdueshëm të kurseve të ndryshme, si dhe prindërit për mbështetjen dhe nxitjen e fëmijëve drejt artit, krijimtarisë dhe aktiviteteve të tilla edukative.

Gjithashtu, ai shprehu mirënjohje për të gjithë ata që mbështesin dhe kontribuojnë në zhvillimin e këtyre aktiviteteve kulturore dhe fetare.

Më pas, një fjalë përshëndetëse mbajti Imami i xhamisë Barbullush, H. Ervis Molla, i cili falënderoi pjesëmarrësit dhe vlerësoi rëndësinë e kultivimit të artit dhe vlerave shpirtërore te fëmijët, duke i inkurajuar ata të vazhdojnë rrugën e krijimtarisë dhe edukimit të shëndoshë.

Gjatë ekspozitës u shpalosën piktura të shumta me tematikë fetare, kulturore dhe tradicionale, ndërsa piktura më e vlerësuar e ekspozitës nga komisioni ishte ajo e nxënëses Medina Kameri, e cila kishte paraqitur në mënyrë artistike xhaminë Barbullush, duke e ndërthurur bukur me elemente të Qendrës Kulturore.

Aktiviteti u përmbyll në një atmosferë të ngrohtë bashkëbisedimi, ku të pranishmit patën mundësinë të shijonin edhe një koktej rasti, duke e kthyer këtë ekspozitë në një moment të veçantë vëllazërimi dhe bashkimi komunitar.

Ekspozita do të qëndroj e hapur për vizitorët deri më 31 dhjetor 2025.