Pas 20 vitesh, tubimi i Mevludit në xhaminë e Vukatanës
Paraditën e së dielës, më 20 shtator 2026, në xhaminë e fshatit Vukatanë, u zhvillua një aktivitet me vlerë, në kuadër të tubimeve që Myftinia Shkodër organizon me rastin e Përkujtimit të Lindjes dhe Mesazhit të Hz. Muhammedit (alejhis-selam).
Aktiviteti nisi me leximin e një ashereje nga Kur’ani Famëlartë, nga teologu Alban Kali.
Më pas, imami i xhamisë, H. Vullnet Pishtari, falënderoi pjesëmarrësit, duke theksuar se këto tubime janë dëshmi e nevojës që kemi për të lexuar jetën dhe misionin e Pejgamberit tonë.
Në ligjëratën e rastit, Myftiu i Shkodrës, Imam Muhamed B. Sytari, vuri theksin tek rëndësia që ka shtimi i salavatit, si sekreti i dashnisë, që na mban të lidhur pas dritës dhe mesazhit hyjnor, me të cilin u dërgua Hz. Muhammedi (alejhis-selam).
Programi vijoi me këndimin e disa ilahive dhe pjesëve të përzgjedhura të “Mevludit”, të kënduara nga imamët: H. Vehbi Dani, H. Alban Kali, H. Vullnet Pishtari, H. Ahmed Molla, H. Bujar Hoxhani dhe H. Elsamed Tula.
Aktivitetin e zbukuroi edhe pjesëmarrja dhe këndimi i imamit të nderuar, H. Astrit Nikaj, nga Mali i Zi.
Njëkohësisht, H. Vehbi Dani, dha disa këshilla me vlerë për të pranishmit.
Aktiviteti u mbyll me faljen e namazit të mesditës me xhemat.
