“Ramazani, muaji i ripërtëritjes shpirtërore”, aktivitet me motrat besimtare

“Ramazani, muaji i ripërtëritjes shpirtërore”, aktivitet me motrat besimtare

Paraditën e të shtunës, më 22 shkurt 2025, Myftinia Shkodër organizoi një tribunë fetare për motrat besimtare me titull: ” Ramazani, muaji i ripërtëritjes shpirtërore”, si një buqetë emocionesh në prag Ramazani”.

Ky aktivitet i dha jehonë fillimit të muajit të Madhëruar të Ramazanit, duke krijuar një atmosferë të ngrohtë e frymëzuese, si dhe emocione të përzemërta nga të pranishmet, të cilat kishin mbushur plot sallën.

Programi i këtij aktiviteti ishte ndërthurur me  ligjërata të mbajtura nga profesoreshat e nderuara, si dhe lexim të Kur’anit Famëlartë, ilahi të ndryshme dhe poezi, që u përcollën me mjeshtëri nga grupi i fëmijëve dhe vajzat e reja.

Temat e kumtuara në këtë aktivitet ishin: “Agjërimi i Ramazanit mes tradicionales dhe dinamikave te reja” – teologia MSc. Jetmira Plaku;  “Agjërimi dhe ndikimi i tij në shëndetin mendor” –  pedagogia e psikologjisë Dr. Jonida Lesha, dhe “Si t’i shmangim shpërqendrimet gjatë Ramazanit” – teologia MSc. Zamira Bushati.

Këto ligjërata trokitën në çdo mendje e zemër, për të hapur dyert për mysafirin e begatë, muajin e shenjtë të Ramazanit.

Myftinia Shkodër ju uron: “Me zemër të mirë Muajin Ramazan!”