Promovohet libri: “Metodat e edukimit në Islam, shembuj nga Profeti Muhammed (a.s)”

Promovohet libri: “Metodat e edukimit në Islam, shembuj nga Profeti Muhammed (a.s)”

Pasditen e së enjtes, më 24 prill 2025, në mjediset e jashtme të xhamisë “Ebu Bekër” – Fushë Çelë, u zhvillua ceremonia e promovimit të librit më të ri me titull: “Metodat e edukimit në Islam, shembuj nga Profeti Muhammed (a.s)”, me autor Besim Barbullushi.

Ky aktivitet, i organizuar nga Myftinia Shkodër, mblodhi besimtarë, studiues dhe dashamirës të librit, të cilët ndoqën me vëmendje paraqitjet dhe fjalët përshëndetëse të një sërë personalitetesh të fushës fetare dhe arsimore. Mes të pranishmëve që morën fjalën ishin: teologu Arben Halluni, z. Kujtim Dervishi, drejtor i Medresesë së Shkodrës, “H. Sheh Shamia”, prof. Erzen Koperaj, si dhe Myftiu i Shkodrës, Imam Muhamed B. Sytari, i cili theksoi rëndësinë e edukimit në dritën e modelit profetik dhe vlerësoi punën kërkimore të autorit.

Ndërkaq, Myftiu vlerësoi autorin, i cili ka kohë që trajton tematikën e arsimit, i cili mbështetet në ruajtjen e tabanit dhe traditës profetike. Ky hulumtim vlerëson parimet dhe teoritë moderne të mësimdhënies në kuadër të metodave unike të mësimdhënies së Profetit Muhammed (a.s).

Në përfundim të fjalës së tij, Myftiu në shenjë respekti dhe vlerësimi për punën e autorit i dhuroi një sexhade me derën e Qabës së Madhnueshme dhe një udhëtim për në Umre, dhuratë nga Myftinia Shkodër.

Në përmbyllje të aktivitetit, fjalën e mori edhe vetë autori, H. Besim Barbullushi, i cili shprehu falënderimet e tij për pjesëmarrësit, por edhe për bashkëpunëtorë të botimit të librit, si dhe ndau disa nga motivimet dhe qëllimet që e shtynë drejt hartimit të këtij botimi.

Libri i ndarë në tre kapituj sjell një qasje të thelluar mbi metodat edukative që ka ndjekur Profeti Muhammed (a.s), duke i paraqitur ato në një formë të kuptueshme dhe praktike për lexuesin e sotëm, me qëllim që të shërbejë si një udhërrëfyes në edukimin islam bashkëkohor si dhe të shërbejë si një burim frymëzimi dhe njohurie për edukatorët dhe studiuesit e arsimit.