Pasdite me përjetime shpirtërore në xhaminë Mes-Myselim, Postribë

Pasdite me përjetime shpirtërore në xhaminë Mes-Myselim, Postribë

Ditën e xhuma, më 2 maj 2025, pas faljes së namazit të iqindisë, Myftinia Shkodër organizoi një pasdite me përjetime shpirtërore në xhaminë Mes-Myselim, Postribë.

Në këtë aktivitet morën pjesë besimtarë të zonës, imamë, të rinj dhe të reja, etj.

Programi u hap me lexim nga Kur’ani Famëlartë nga njëra prej nxënëseve të mejtepit të Qendrës Kulturore të fshatit Mes-Myselim, e pasuar nga fjala hyrëse e teologut Arben Halluni.

Më pas, të pranishmit i përshëndeti imami i xhamisë , H. Fatmir Sula, duke falënderuar pjesëmarrësit dhe inkurajuar për ruajtjen e vlerave të përbashkëta shpirtërore.

Ligjëratën kryesore të kësaj pasditeje e mbajti Myftiu i Shkodrës, Imam Muhamed B. Sytari. Në fjalën e tij, ai u ndal veçanërisht te rëndësia e lutjes në jetën e një besimtari, duke e cilësuar atë si “trurin e adhurimit”.

Ai theksoi se adhurimi ndaj Allahut (xh.sh) duhet të burojë nga zemra dhe të jetë i vetëdijshëm, duke kuptuar thellësisht pse i drejtohemi Zotit Fuqiplotë me namaz, agjërim dhe vetëpërmbajtje.

“…Islami kërkon që njeriu të rritet çdo ditë në marrëdhënien e tij me Zotin. Zemrat e ngurta përmenden në Kur’an, por si mund ta çlirojmë zemrën nga ngurtësia? Përmes dashurisë për Allahun (xh.sh) dhe përkushtimit të sinqertë ndaj Tij…”, theksoi ndër të tjera Myftiu Sytari.

Në fund të aktivitetit, nxënësit e mejtepit prezantuan një program me ilahi dhe recitime fetare, duke i dhënë një atmosferë të veçantë pasdites.

Aktiviteti u mbyll me një koktej të organizuar për pjesëmarrësit dhe shpërndarjen e librit “Bindja ndaj Allahut dhe të Dërguarit të Tij”, të autorit të njohur Hoxhë Osman Nuri Topbash.