Një grup të rinjsh nga Shkodra nisen drejt Vendeve të Shenjta
Ditën e shtunë, më 10 tetor 2026, një grup të rinjsh nga qyteti i Shkodrës u nisën drejt Vendeve të Shenjta për kryerjen e adhurimit të Umres.
Më herët, Myftiu i Shkodrës, Imam Muhamed B. Sytari, zhvilloi një bashkëbisedim me grupin në fjalë, ku ndër të tjera mbajti edhe një ligjëratë udhëzuese për këtë udhëtim të begatë.
Në ligjëratën e tij, Myftiu i Shkodrës dha këshilla me dobi për të pranishmit, me qëllim që të shfrytëzojnë çdo moment të këtij udhëtimi të paharruar, për të shijuar çdo etapë të tij nën drejtimin e udhëheqësit të grupit, imamit të nderuar nga Ulqini, H. Suad Ukoshata.
Myftiu informoi të pranishmit për rëndësinë dhe vlerën e vendeve të shenjta, si dhe dobitë e mëdha që përfitohen me kryerjen e Umres.
Ai hodhi dritë rreth haditheve që përkufizojnë pesë përfitimet kryesore të Umres, duke uruar të gjithë pjesëmarrësve në këtë udhëtim jete për adhurime të pranuara dhe Umre plot begati.
Ditën e sotme, në përcjelljen e tyre, Myftiu i Shkodrës u lut që të kenë rrugë të mbarë dhe të kthehen shëndoshë e mirë, me adhurime dhe lutje të pranuara.
