Iftari i vëllazërisë dhe harmonisë islame në Shkodër

Iftari i vëllazërisë dhe harmonisë islame në Shkodër

Në një atmosferë të ngrohtë vëllazërie dhe bashkimi, Myftinia Shkodër, ditën e shtunë, më 14 mars 2026 organizoi iftarin tradicional të tre Myftinive të trojeve shqiptare: Shkodër, Prizren dhe Ulqin, një veprimtari që forcon lidhjet shpirtërore dhe bashkëpunimin ndërmjet besimtarëve dhe institucioneve islame.

Në këtë iftar morën pjesë Myftiu i Shkodrës, Imam Muhamed B. Sytari, kryetari i Këshillit të Bashkësisë Islame të Prizrenit, Valon ef. Ibrahimi, kryeimami i Ulqinit, Ali ef. Bardhi, anëtarë të stafit, këshillit të Myftinisë Shkodër, imamë, bashkëpunëtorë, miq e shumë të ftuar.

Në fjalën e tij të përshëndetjes, Myftiu Sytari theksoi se Ramazani është një shkollë e madhe shpirtërore që i afron zemrat, forcon solidaritetin dhe rikujton përgjegjësinë që besimtarët kanë ndaj njëri-tjetrit dhe ndaj shoqërisë.

Ndërsa kryetari i Këshillit të Bashkësisë Islame të Prizrenit, Valon ef. Ibrahimi, vlerësoi rëndësinë e ruajtjes së unitetit dhe bashkëpunimit ndërmjet institucioneve islame të trojeve shqiptare, duke e cilësuar këtë iftar si një simbol të bukur të vëllazërisë dhe traditës sonë të përbashkët.

Gjithashtu, kryeimami i Ulqinit, Ali ef. Bardhi, në përshëndetjen e tij theksoi se takime të tilla në muajin e Ramazanit forcojnë lidhjet shpirtërore dhe kultivojnë frymën e dashurisë, respektit dhe harmonisë ndërmjet besimtarëve.

Ky iftar u zhvillua në një atmosferë shumë miqësore dhe vëllazërore, i cili u shoqërua me dua-lutje për njeri-tjetrin dhe u mbyll me faljen me xhemat të namazit të akshamit.