Myftiu priti imamin e shoqatës ASIS, Dandenong, Australi
Paraditen e së hënës, më 28 shtator 2026, Myftiu i Shkodrës, Imam Muhamed B. Sytari, priti në një takim të përzemërt dhe vëllazëror teologun e nderuar Besim Barbullushi, i cili shërben prej më shumë se një viti si imam në Albanian Sakie Islamic Society of Dandenong (ASISD), në Victoria të Australisë.
Gjatë takimit të përzemërt, Myftiu u interesua për aktivitetin e Qendrës Islame Shqiptare në Victoria dhe atë të imamit shkodran, teologut Besim Barbullushi. Njëkohësisht, ai shprehu kënaqësinë e tij që, gjatë dekadave të fundit, disa imamë të nderuar nga qyteti i Shkodrës kanë shërbyer me përkushtim të madh në disa shtete të botës, duke përcjellë në këtë mënyrë dijen, urtësinë dhe trashëgiminë e vyer islame të qytetit të Shkodrës anembanë botës.
Nga ana e tij, teologu Barbullushi e falënderoi Myftiun për mikpritjen dhe e informoi atë për aktivitetin e gjerë të Qendrës Islame Shqiptare në Dandenong të Victorias.
Ai njëkohësisht i përcolli Myftiut selamet e përzemërta të kryesisë së ASISD-së, me lutjet e përzemërta për rritjen e bashkëpunimit në mes të dy institucioneve.
Më poshtë, një historik i shkurtër i Qendrës Islame Shqiptare në Dandenong të Victorias.
Albanian Sakie Islamic Society of Dandenong – Historia dhe komuniteti
Albanian Sakie Islamic Society of Dandenong (ASISD), ndodhet në 10–12 Dalgety Street, Dandenong, Victoria 3175, Australi. Organizata është e regjistruar zyrtarisht në Australi si Albanian Islamic Society of Dandenong.
Historia e xhamisë
Historia e këtij komuniteti lidhet ngushtë me emigracionin shqiptar në Dandenong, veçanërisht me shqiptarët me prejardhje nga Këshava, në rajonin e Manastirit (Bitola), në Maqedoninë e Veriut.
Nga fillimi i viteve 1960, familje shqiptare nga kjo zonë filluan të vendoseshin në Dandenong. Me kalimin e viteve, nëpërmjet lidhjeve familjare dhe emigracionit të mëtejshëm, u krijua një komunitet i konsiderueshëm shqiptar mysliman.
Xhamia e Dandenongut u ndërtua dhe u hap në vitin 1985. Kjo do të thotë se në vitin 2026 ajo ka rreth 41 vjet histori.
Historikisht, një pjesë e madhe e komunitetit është me origjinë nga Këshava dhe rajoni i Manastirit, por xhamia nuk frekuentohet vetëm nga shqiptarët. Në burimet historike përmenden edhe myslimanë me prejardhje turke, afgane dhe nga komunitete të tjera që kanë marrë pjesë në jetën e xhamisë.
Xhamia numëron më shumë se 1000 familje anëtare të rregullt.
