Ditën e shtunë, më 3 tetor 2020, pas namazit të akshamit në xhaminë e Anës së Malit, u zhvillua ligjërata e të shtunës, në kuadër të aktivitetit periodik: “Xhamia na mbledh, drita e All-llahut na udhëzon”.
Ligjërata e kësaj mbrëmje u mbajt nga Myftiu i Shkodrës, Imam Muhamed B. Sytari, i cili hodhi dritë rreth temës së qëndrueshmërisë në fenë islame.
Ndër të tjera, Myftiu theksoi se: “Ky Islam është Dritë e pastër, që nuk njolloset nga askush në botë! Pra, sikur të mblidhen krejt djajt e botës për ta njollosur sadopak këtë Islam të pastër, nuk do ia arrijnë, të dashurit e mi!
Dikur ju thonin: ‘Problemi i hixhabit’, sot ju thonë: ‘Islami në krizë!?’, aty ju thonë: ‘Karikaturat (e gjoja Profetit) janë liri e të shprehurit!?’, këtu ju thonë: ‘Laicizmi”, etj.
Të gjitha këto propaganda së bashku, nuk arrijnë dot ta shuajnë këtë dritë të pastër, që përhapet ditë pas dite, gjithandej nëpër botë, për të dëshmuar gjithësecili prej nesh me sytë e zemrës e me sytë e ballit atë fjalë të madhe të Pejgamberit (a.s) që thoshte: ‘Do të mbërrijë kjo çështje (kjo fé), ku ka mbërritur nata dhe dita!’.
Kjo do të thotë se ky Islam dhe kjo Dritë e madhe është shpresa e këtij shekulli, është e mira e madhe e munguar e njerëzimit në këtë kohë dhe në këtë shekull, që do të thotë se ky shekull është shekulli i Islamit!
Prandaj, ti si musliman, a je gati për ta dëshmuar mirësinë e kësaj dëshmie të madhe të Pejgamberit (a.s), për të qenë përhapës i kësaj Drite?”.
Aktiviteti i kësaj mbrëmje u përshëndet edhe nga teologu Ervil Kuçi, përgjegjës i sektorit të rinisë në Myftininë e Shkodrës.
Ligjërata e plotë:
