Ceremoni festive në nder të haxhilerëve shkodranë – 1445/2024

Ceremoni festive në nder të haxhilerëve shkodranë – 1445/2024

Pasditën e së enjtes, më 6 qershor 2024, në xhaminë e Parrucës, Myftinia Shkodër organizoi ceremoninë festive, në nder të 51 haxhilerëve shkodranë, që këtë vit do të jenë pjesë e ritualeve të Haxhit 2024/1445.

Pas leximit e një pjese kur’anore të kënduar nga Shejkh Muhammed Siddik El-Minshavi, shfaqur në monitor, teologu Arben Halluni bëri hapjen e aktivitetit që pasoi me nga një përshëndetje dhe urim nga imamët e xhamisë Parrucë, H. Naim Drijaj dhe H. Durim Kasemi.

Ndërsa, Myftiu i Shkodrës, Imam Muhamed Sytari, përcolli mesazhin e tij duke iu drejtua të pranishmëve për Haxh të pranuar nga Allahu (xh.sh), për të përfituar nga mirësitë e atyre tokave të shenjta, ku mblidhen miliona besimtarë nga mbarë bota për të kryer ritualin e jetës, Haxhin, si një prej pesë kushteve të Islamit.

Sikurse, Myftiu u kërkoi haxhilerëve të sivjetshëm që përveç lutjes për veten familjen, vendin, të mos harrojnë lutje të veçantë për vëllezërit e tyre në Palestinën martire, në ditën e Arafatit, në momentin e daljes para Qabes së Madhnueshme, me u lutë për vëllezërit dhe motrat tuaj, të cilët jo vetëm nuk kanë mundësi të jenë pjesë në ritualin e haxhit, por as nuk kanë mundësi të ndjekin Haxhin nga ekrani, siç e ndjekim ne në mjediset tona, sepse nuk kanë shtëpi, sepse u janë bombarduar, djegë e asgjësuar para syve të botës së dhunës dhe gjenocidit..!

Në vijim të kësaj ceremonie ishte prezantimi i disa recitimeve nga nxënësit e mejtepit të xhamisë Bardhaj dhe shfaqja e dokumentarit “Zemzemi, Uji i Bekuar”.

Momenti më i bukur në fund të kësaj ceremonie ishte thirrja e emrave të haxhilerëve për marrjen e ihramit dhe dokumenteve të Haxhit.