Ceremoni nderimi për humanistin Sami Repishti, mori pjesë edhe Myftiu i Shkodrës
Ditën e xhuma, më 6 dhjetor 2024, Universiteti i Shkodrës dhe familja Repishti organizuan homazhe për personalitetin dhe humanistin shqiptar, Prof. Sami Repishti, i ndarë nga jeta pak ditë më parë, në moshën 99 vjeçare, në ShBA.
Të pranishëm në këtë ceremoni homazhi ishin autoritete fetare dhe civile, pedagogë, miq dhe familjarë.
Gjatë kësaj ceremonie u mbajtën fjalime vlerësime dhe nderimi për figurën e tij, nga rektori i universitetit, Prof. Dr. Tonin Gjuraj, z. Maxhid Cungu, znj. Ardita Repishti, etj, ku në fjalët e tyre përshëndetëse u vlerësua kontributi i Prof. Repishtit dhe rëndësia e ruajtjes së trashëgimisë së tij.
Kjo ceremoni nderimi u mbyll me mesazhet e të pranishmëve në librin e ngushëllimeve, në mes tyre edhe Myftiu I Shkodrës, Imam Muhamed B. Sytari, për humanistin dhe simbolin e qëndresës ndaj regjimit kriminal komunist si dhe një luftëtar për të drejtat e liritë njerëzore.
Kush ishte Prof. Sami Repishti?
Profesor Sami Repishti u lind në gjirin e familjes së Hafiz Ibrahimit dhe Hava Bushatit në lagjen Dudas në Shkodër më 6 prill 1925. I ati ishte figurë me autoritet në shoqërinë shkodrane të asaj kohe dhe më pas deputet në Kuvendin Kombëtar. Në vendlindje kreu mësimet fillore në shkollën “Oso Kuka” dhe të mesmen pranë gjimnazit të Shkodrës, ku ra në kontakt edhe me lëvizjen komuniste.
Më 1942 mbaron maturën. Merr pjesë në një konkurs në Tiranë për studime të larta jashtë shtetit. 112 kandidatura, konkurronin për 28 bursa studimi të profesioneve të ndryshme. Mbas 2 ditëve, mësoi se e ksihte fituar bursën nga Ministria e Arsimit për në Fakultetin e Historisë së Firences.
Me mbërritjen në atdhe më 1943 shkon të verojë në Repisht, prej ku kishte origjinën familja e tij. Duke qenë se strehoi një nip të tijin që kishte ide komuniste, autoritetet fashiste arrestojnë të atin dhe e torturojnë duke sjellë vdekjen e tij prej hemorragjisë më dt. 29 shtator 1943. Samiu duke qenë i pari i shtëpisë detyrohet t’i sigurojë bukën familjes.
Punon në Sektorin e rindërtimit me të hyrë në pushtet regjimi i ri. Themelon me shoqërinë e tij një Organizatë të Rinisë Demokratike, shpërndanë trakte dhe i dorëzuan një Memorandum një deputeti anglez që vizitoi Shkodrën dhe ndihmonin familjet e të arratisurve. Në maj të 1946 mori pjesë në proçesionin e varrimit të Arqipeshkvit Imzot Gaspër Thaçi. Ishte data 22 tetor 1946, kur e arrestojnë forcat e sigurimit në vendin e punës me akuzën “Agjitacion e propagandë kundër shtetit”. Për 14 muaj, iu nënshtrua hetimeve intensive ku takon dhe prof. Kolë Prelën. Dënohet nga pretenca e gjyqit me 15 vjet heqje lirie, në burg do shoqërohej me P. Çiprian Nikën dhe vëllanë e prof. Kolës, Markun. Më 28 nëntor 1947 dërgohet në Burgun e Madh dhe më tej në kampin e Vloçishtit dhe në Beden të Kavajës më 1948. Mbas kampit të punës së detyruar në Orman Pojan të Korçës, rikthehet në burgun e Shkodrës, në fund të muajit nëntor.
Mbas daljes nga burgu më 1956 punoi javën e parë si pastrues i barit të keq në stadium, javën e dytë e caktojnë të punojë në kanalizimin e tokave të Qendrës Zooteknike. Kështu e gjeti edhe viti 1956. Më vonë si ndihmës karpentier deri në ditën e arratisjes, 22 gusht 1959. Në Jugosllavi izolohet; lirohet nga izolimi në prill 1961dhe punësohet përkohësisht (ndërkohë studion serbokroatishten dhe anglishten.) Por shumë shpejt (qershor 1961), përfundon në kampin e refugjatëve të Gerovës, Kroaci.
Më 1 shtator 1961, arratiset nga kampi i Gerovës dhe vendoset në Itali. Qëndroi në Trieste, në kampin e refugjatëve San Sabba, ku në tri javë fitoi të drejtën e azilit politik. Mbas një qëndrimi gjashtëmujor në kampet e Capua-s dhe Latina–s, pranë Napolit dhe Romës, mbas shumë vuajtjesh, më 9 prill 1962, emigroi për në ShBA. Merr pjesë në takimin e pesëdhjetë vjetorit të “Vatrës“, ku dhe takon mikun e të atit në periudhën e opozitarizmit, Imzot Nolin. Fitoi qytetarinë (citizenship) amerikane më 1968. Doktoroi pranë Departamentit të Frëngjishtës në City University of New York (1977). Për 25 vjet me radhë, ka dhënë mësim në kolegjet amerikane. Ka qenë kryetar i Departamentit të Gjuhëve të Huaja, për shkollat e qytetit Malverne, New York, koordinator i programit për studime të avancuara, versity, Adelphy, Garden Lice-UniCity, NY, 1976-1991 dhe po aty pedagog i jashtëm. Udhëtimin e vetëm në Kosovën e çliruar e realizoi në prillin e 2000.
(Biografia është marrë nga www.kujto.al)
