Xhamia Alimetaj zbukurohet në prag të muajit të Begatë të Ramazanit
Fryma e begatë e parapërgatitjes për pritjen e muajti të Madhërueshëm të Ramazanit është në vetvete një mirësi e madhe nga Zoti i gjithësisë, i Cili na tërheq drejt mëshirës dhe faljes së Tij edhe nëpërmjet përgatitjes tonë për pritjen e muajit të Madhërueshëm të Ramazanit.
Gjithandej në xhami të ndryshme dhe në shtëpitë e besimtarëve shihen përgatitjet për ta pritur si duhet muajin e Begatë të mëshirës dhe faljes.
Edhe në xhaminë e fshatit Alimetaj, nën drejtimin e imamit të saj, H. Lulzim Beqiri, këshillit të xhamisë dhe besimtarëve po punohet për lyerjen, pastrimin dhe zbukurimin e xhamisë në prag të muajit të Madhërueshëm të Ramazanit.
Patjetër, që mirëmbajtja e xhamive është porosi kur’anore dhe traditë e Pejgamberit tonë (a.s), dhe angazhim i përhershëm i besimtarëve, që zemrat i kanë të lidhura pas shtëpive të Allahut.
Kjo traditë e bukur e trashëguar ndër shekuj në mesin e besimtarëve shkodranë, por jo vetëm, në prag të muajit të Madhërueshëm të Ramazanit është sinjali më i mirë për të gjithë besimtarët dhe komunitetin mbarë, që një muaj i madhërueshëm po vjen dhe siç përkujdesemi për pamjen e jashtme të xhamive tona, ashtu duhet të përkujdesemi edhe për të brendshmen e zemrave tona, dhe përgatitjen e duhur për ta pritur muajin e Madhërueshëm të Ramazanit me pendim, kthim nga dyert e Allahut (a.xh) dhe drejtim nga dashnia dhe mëshira e Tij.
Myftinia Shkodër falënderon besimtarët bujarë të zonës së Anës së Malit për kontributet e tyre të vazhdueshme për mirëmbajtjen e xhamive, për sistemimin e oborreve, për lyerjen dhe frymën e përkushtimit të dëshmuar ndaj besimit dhe traditave islame ndër shekuj.
