Ceremonia protokollare e përurimit të xhamisë së Plumbit!

Ceremonia protokollare e përurimit të xhamisë së Plumbit!

Sot, e enjte më 8 maj 2025, u zhvillua ceremonia zyrtare e inaugurimit të Xhamisë së Plumbit në Shkodër, një prej monumenteve më të rëndësishme të trashëgimisë kulturore dhe fetare islame në Shqipëri. Kjo ngjarje shënon përfundimin e një procesi të gjatë restaurimi, të mundësuar falë financimit dhe mbështetjes së qeverisë turke, nëpërmjet Drejtorisë së Përgjithshme të Vakëfeve (TDV).

Në këtë ceremoni të veçantë morën pjesë figura të larta nga jeta fetare, diplomatike dhe institucionale, ndër ta Myftiu i Shkodrës, Imam Muhamed B. Sytari, ambasadori i Republikës së Turqisë në Tiranë, z. Tayyar Kağan Atay, kryetari i Bashkisë së Shkodrës, z. Benet Beci, si dhe deputetë, përfaqësues të shoqatave kulturore e fetare, përfaqësues të institucioneve të ndryshme, qytetarë dhe besimtarë nga Shkodra dhe më gjerë.

Gjatë fjalës së tij, Myftiu Sytari falënderoi të gjitha institucionet që kontribuuan në restaurimin e xhamisë, duke theksuar se ky objekt është një dëshmi historike e bashkëjetesës ndërfetare dhe trashëgimisë shpirtërore të Shkodrës. Ai theksoi rëndësinë e kthimit të xhamisë në funksion si vend adhurimi dhe reflektimi për besimtarët.

Ambasadori turk, z. Atay, u shpreh se Xhamia e Plumbit është një simbol i lidhjeve të forta historike e kulturore mes Shqipërisë dhe Turqisë.

Ndërsa kryebashkiaku Beci vlerësoi rëndësinë e restaurimit të monumenteve të tilla si pjesë e identitetit dhe kujtesës historike të qytetit të Shkodrës.

“Xhamia e Plumbit, një nga monumentet më të rralla të trashëgimisë sonë kulturore, është rikthyer më e bukur se kurrë më parë.

E restauruar me kujdes dhe pasion, kjo perlë arkitekturore tani qëndron hijerëndë pranë Kalasë së Rozafës, në zemër të zonës historike të Shkodrës.

Një simbol i historisë, kulturës dhe bashkëjetesës që na bën krenarë si qytet!”, ka qenë mesazhi i kryetarit të Bashkisë Shkodër, z. Beci.

Ceremonia simbolike e prerjes së shiritit, kulmoi me fjalën dhe urimin virtual nga Ankaraja e Presidentit të Republikës së Türkiyes, ShTZ. Rexhep Tajjip Erdogan.

Xhamia e Plumbit, e ndërtuar në shekullin XVIII nga Mehmet Pasha Bushati, është një nga objektet më të njohura të trashëgimisë osmane në Ballkan. Restaurimi i saj i rikthen Shkodrës një thesar të çmuar arkitektonik dhe shpirtëror.