Filloi edicioni i 4-të i Kursit Veror Buz’qesh 2025

Filloi edicioni i 4-të i Kursit Veror Buz’qesh 2025

Ditën e hënë, më 16 qershor 2025, në ambientet e vakëfit të xhamisë së madhe, “Ebu Bekër”, Fushë Çelë, filloi kursi veror Buz’qesh 2025, edicioni i tij i 4-të, organizuar nga sektori i arsimit, pranë Myftinisë Shkodër.

Ky kurs i veçantë për fëmijët që do zgjasë deri më 4 korrik është një kombinim i përsosur mes mësimit dhe argëtimit, duke siguruar një eksperiencë të paharrueshme për ta.

Kursi Buz’qesh 2025 do të përqendrohet në këtë edicion në edukimin e fëmijëve me vlerat islame, arte, veprimtari argëtuese, shëtitje, lojëra zbavitëse të organizuara si dhe do të ketë miq të rinj të ftuar dhe buzëqeshje pafund.

Në hapjen e këtij kursi veror, ishte i pranishëm teologu Arben Halluni, drejtuesi i arsimit, pranë Myftinisë Shkodër, i cili gjatë fjalës përshëndetëse, i uroi mirëseardhjen fëmijëve në këtë kurs veror me karakter edukativ dhe zbavitës.

Ndërkaq, teologu Halluni falënderoi angazhimin dhe përkushtimin e mësueseve të nderuara, konkretisht teologen Zamira Bushati (Puka) dhe znj. Almeda Tusha, psikologe, si dhe disa vajza vullnetare dhe animatore, për angazhimin dhe koordinimin e tyre më qëllim mbarëvajtjen sa më mirë të këtij programi me vlerë arsimore dhe edukative.

Në një prononcim mediatik teologu Halluni u bëri thirrje prindërve që: “Të mos i lini fëmijët në mëshirën e rrjeteve sociale dhe të rrugëve, por sillni në këto mjedise për të mbjellë tek ata vlera, dije dhe edukatë!”

Kujtojmë, se gjatë kësaj periudhe kanë nisur edhe kurse të tjera intensive verore në disa xhami dhe qendra islame.