Në fshatin Omaraj të Postribës, me bereqetin e Ramazanit 1447/2026

Në fshatin Omaraj të Postribës, me bereqetin e Ramazanit 1447/2026

Ditën e hënë, më 16 mars 2026, në kuadër të aktiviteteve humanitare gjatë Muajit të Begatë të Ramazanit, Myftinia Shkodër ka vijuar shpërndarjen e ndihmave ushqimore për familjet në nevojë.

Gjatë ditës së sotme janë shpërndarë 30 pako ushqimore në fshatin Omaraj të Postribës, të cilat iu dedikuan banorëve të këtij fshati. Me këtë rast, përfaqësuesi i Myftinisë Shkodër, teologu Ervil Kuçi, përcolli edhe mesazhin e solidaritetit dhe kujdesit të Myftinisë Shkodër për familjet në nevojë gjatë këtij Muaji të Begatë.

Këto pako ushqimore janë siguruar nga fondacioni bamirës Helping Hand USA, në kuadër të bashkëpunimit të vazhdueshëm me Myftininë Shkodër, bashkëpunim që prej disa vitesh ka sjellë mbështetje të rëndësishme për familjet në nevojë në zonën e Shkodrës.

Gjithashtu, me këtë rast, edhe në kalanë e Drishtit u shpërndanë disa pako të tjera, për familjet në nevojë.

Përmes këtyre nismave humanitare, Myftinia Shkodër synon të jetë pranë komunitetit dhe të nxisë e forcojë frymën e solidaritetit, veçanërisht gjatë muajit të Ramazanit, duke ndihmuar familjet dhe njerëzit që kanë më shumë nevojë.