Hapet Kursi Veror “Buz’qesh 2026”, edicioni i 5-të në xhaminë “Ebu Bekër” – Fushë Çelë

Hapet Kursi Veror “Buz’qesh 2026”, edicioni i 5-të në xhaminë “Ebu Bekër” – Fushë Çelë

Paraditen e të hënës , më 15 qershor 2026, u bë hapja zyrtare e Kursit Veror “Buz’qesh 2026”, edicioni I 5-të, në ambientet e xhamisë “Ebu Bekër” në Fushë-Çelë, një aktivitet arsimor dhe edukativ i organizuar nga sektori i arsimit pranë Myftinisë Shkodër.

Në ceremoninë e hapjes morën pjesë nxënës, prindër, mësueset, teologia Zamira Puka, psikologia Almeda Tusha, animatore vullnetare, përfaqësues të Myftinisë Shkodër.

Të pranishmit i përshëndeti drejtuesi i sektorit të arsimit, pranë Myftinisë Shkodër, teologu Arben Halluni, i cili u uroi mirëseardhjen fëmijëve pjesëmarrës dhe u shprehu urimet më të mira për mbarësi, suksese dhe përfitime sa më të shumta gjatë këtij kursi dhe kampi veror intensiv.

Në fjalën e tij, ai vlerësoi rëndësinë e aktiviteteve edukative gjatë pushimeve verore, duke theksuar se Kursi Veror “Buz’qesh” synon të kombinojë mësimin, edukimin dhe argëtimin në një atmosferë të ngrohtë e miqësore, ku fëmijët të zhvillojnë njohuritë, aftësitë dhe vlerat e tyre njerëzore e fetare.

Ky kurs, i cili do të zgjasë tre javë, nga data 15 qershor deri më 3 korrik 2026 do t’u ofrojë mbi 110 fëmijëve pjesëmarrës të moshës 5–12 vjeç një program të pasur me mësime edukative, veprimtari krijuese, lojëra zbavitëse, aktivitete në grup dhe momente të shumta argëtimi.

Atmosfera e ditës së parë u karakterizua nga entuziazmi dhe buzëqeshjet e fëmijëve, duke shënuar një fillim të mbarë të këtij aktiviteti tashmë tradicional, i cili prej vitesh mirëpritet me shumë interes nga komuniteti.

Kurse të tilla intensive verore janë hapur dhe do të vazhdojnë të hapen edhe në qendrat kulturore dhe në disa xhami të qytetit dhe fshatit, me qëllim që sa më shumë fëmijë të kenë mundësi të përfitojnë nga këto aktivitete edukative, arsimore dhe argëtuese gjatë periudhës së pushimeve verore.