Falja e Fitër Bajramit dëshmi e tabanit dhe e traditës islame në Shkodër

Falja e Fitër Bajramit dëshmi e tabanit dhe e traditës islame në Shkodër

Që në orët e para të mëngjesit, të ditës së sotme, e diel, më 30 mars 2025, besimtarë të shumtë iu drejtuan xhamive të Shkodrës për të kryer faljen e Fitër Bajramit.

Atmosfera festive dhe shpirtërore e cila shoqëroi ceremoninë e Fitër Bajramit ishte një dëshmi e tabanit dhe e traditë islame shkodrane. Xhamitë të mbushura plot me besimtarë, të cilët kishin ardhur për marrë pjesë në këtë ditë gëzimi dhe shpërblimi për secilin prej tyre, pas një muaji agjërim dhe adhurimet të shumta, që i kishin kryer gjatë muajit të Begatë të Ramazanit.

Ceremonia qendrore u zhvillua në xhaminë e Parrucës, ku qindra besimtarë, të mbushur me gëzim dhe paqe, falën namazin e Fitër Bajramit. Ligjëratën kryesore e mbajti Myftiu i Shkodrës, Imam Muhamed B. Sytari, i cili theksoi rëndësinë e të qënurit besimtarë të vërtetë, adhurues të sinqertë, falënderuar ndaj mirësive, solidarizues me nevojtarët, falës dhe përhapës të vlerave universale islame, të paqes, harmonisë, tolerancës, etj, në shoqëri.

Po ashtu, në këtë ceremoni ligjëroi edhe H. Durim Kasemi, i cili foli mbi vlerën shpirtërore të sakrificës dhe përkushtimit ndaj besimit. Gjithashtu, H. Durim Kasemi mbajti edhe hytben e Bajramit.

Një tjetër ceremoni e rëndësishme u zhvillua në xhaminë “Ebu Bekër”, ku teologu Arben Halluni dhe H. Idmir Plaku mbajtën fjalime frymëzuese mbi rëndësinë e besimit dhe jetës së pastër shpirtërore. Ata i bënë thirrje besimtarëve të kultivojnë ndjenjat e mirësisë dhe të vazhdojnë rrugën e devotshmërisë edhe pas përfundimit të muajit të shenjtë të Ramazanit.

Në këtë ditë të madhe feste, u fol edhe për banorët e Gazës, të cilët po përjetojnë dhunën, terrorin dhe krimet më monstruoze të parë ndonjëherë nga njerëzimi, ku me gjithë solidaritetin e masave në mbarë botën në përkrahje të popullsisë së Gazës, qeveritë e shumë vendeve perëndimore, jo vetëm që nuk po e ndalin dhunë, vrasjen dhe krimet njerëzore, por po i ndihmojnë pushtuesit të vazhdojë në krimin dhe vrasjet e tij, të grave, fëmijëve, pleqve dhe këdo që ndodhet në atë tokë të shenjtë.

Imamët dhe hoxhallarët u lutën për paqe, harmoni dhe dashuri, e që Zoti t’i bekojë të gjithë me mirësitë dhe begatitë e Tij dhe tua pranojë secilit agjërimin dhe adhurimet.

Pas faljes, besimtarët shkëmbyen urime me njëri-tjetrin, duke ndarë gëzimin e kësaj dite të bekuar.

Fitër Bajrami, si një ditë e faljes dhe harmonisë, solli një mesazh të fuqishëm uniteti dhe vëllazërie, duke forcuar edhe më shumë lidhjet ebesimtarëve me njëri tjetrin.