Në Shkodër festohet me madhështi Kurban Bajrami

Në Shkodër festohet me madhështi Kurban Bajrami: Dita e madhe e përkushtimit, sakrificës, dëshmisë së besimit dhe vlerave njerëzore!

Ditën e xhuma, më 6 qershor 2025, me rastin e festës së Kurban Bajramit, një nga ditët më të rëndësishme të besimit islam, në sheshin vakëf të Fushë Çelës në Shkodër u zhvillua ceremonia madhështore e faljes së Bajramit, e mbushur me atmosferë shpirtërore, lutje dhe reflektim.

Pas faljes së sabahut drejtuar nga H. Durim Kasemi, në këtë ceremoni ligjëruan me tema të larmishme: H. Ensar Ismalaj, H. Idmir Plaku dhe H. Arben Halluni.

Ndërsa, namazi dhe hytbeja e Kurban Bajramit u mbajt nga H. Lavdrim Hamja, i cili solli mesazhe të thella shpirtërore dhe vlera që lidhen me sakrificën, devotshmërinë dhe përkushtimin ndaj Zotit Fuqiplotë.

Në fjalimin para faljes së namazit së Bajramit, H. Arben Halluni, ngriti shqetësimin për fenomenin e largimit masiv të qytetarëve shqiptarë nga vendi: “….Thirrja jonë e vazhdueshme është që të mos braktisin vendin dhe të mos largohen pa u përpjekur këtu. Ikja nuk është zgjidhje!”

Teologu Halluni në mesazhin e tij, theksoi se përgjegjësia për ndërtimin e kombit është e të gjithëve, si e qytetarëve ashtu edhe e drejtuesve të të gjitha niveleve.

Ritet e Kurban Bajramit u zhvilluan në mënyrë të organizuar nga Myftinia Shkodër dhe me pjesëmarrje të gjerë nga besimtarët, në sheshin pranë Xhamisë “Ebu Bekër”, Fushë Çelë.