Flamuri, besimi dhe fëmijët – një ditë festive në xhaminë e Oblikës!

Flamuri, besimi dhe fëmijët – një ditë festive në xhaminë e Oblikës!

Myftinia Shkodër, përmes sektorit të arsimit, zhvilloi ditën e xhuma, më 28 nëntor 2025 një aktivitet festiv në xhaminë e Oblikës, me pjesëmarrjen e nxënësve të kurseve fetare, në kuadër të Festës së Pavarësisë dhe të Flamurit.

Në fjalën e tij të hapjes, drejtuesi i arsimit, teologu Arben Halluni theksoi rëndësinë e ndërthurjes së vlerave fetare me ato atdhetare, duke i edukuar fëmijët dhe të rinjtë me dashurinë për Allahun (xh.sh), atdheun, historinë dhe trashëgiminë shpirtërore e kombëtare.

Fëmijët nën kujdesin e përgjegjëses së përkushtuar të qendrës kulturore Oblikë, znj Kimete Elezi, sollën një program të larmishëm dhe mjaft të bukur, që përfshinte: recitime poezish patriotike, ilahi me përmbajtje shpirtërore, monologë dhe pjesë artistike, mesazhe për paqe, solidaritet dhe respekt ndaj flamurit tonë kombëtarë, etj.

Atmosfera festive, zëri i pastër i fëmijëve dhe emocionet e tyre e kthyen këtë aktivitet në një moment domethënës për komunitetin e zonës Oblikë.

Në përfundim të programit, u hap gjithashtu një ekspozitë me materiale kombëtare, u shtrua një koktejl me ushqime tradicionale të zonës, ndërsa pjesa më interesante ishte dhurimi i flamujve kombëtarë nga nxënësit e qendrës për kalimtarët dhe automjetet e rastit, duke sjellë më shumë frymë festash, bashkimi dhe paqeje.